Red Bull driver inkar a ṭha?

Formula 1 Hungarian Grand Prix-ah Red Bull driver pahnih an in bakkaih palh a, senior zawk Daniel Ricciardo phei chuan intlansiak a tlan tluan ve thei lo hial.

Pathianni zana tlan Hungary GP kawng kawi pahnihna lekah Max Verstappen-a'n a teammate Ricciardo a tai a, he thil thleng vang hian Australian driver Ricciardo chuan a lungawi loh thu a sawi nghal a, hetihlai hian thil ti sualtu zawk Verstappen chuan ngaihdam a dil ve thung.

Kum 28 mi Ricciardo chuan, "Thil a thlen tirh kha chuan hriatthiam a harin ka pawm thiam lo hle. Ngun taka ka ngaihtuah hnuah erawh Max kha kum 19 mi chauh a la nih avangin a thiltih kha a awm lo hran loin ka hria, a la naupangin tawnhriat a la nei tlem deuh a ni," tiin a sawi.

Ricciardo chuan sawi zawmin, "Boruak sa a reh hnuah Max khan ngaihdam min dil a, mimalin inbiakna pawh kan nei. Hmasawn tura thawkrim chhunzawm turin kan inepih leh tawh," a ti.