English club huphurhtu Ancelotti

Bayern Munich manager Carlo Ancelotti chuan kum dang aiin Champions League chu a hautak tur thu a sawi a, a chhan chu Premier League club zingah elpui haktau tur an awm nia a ngaih vang a ni.

Season hmasa lama Champions League khel phak lo Manchester United leh Chelsea te an kir leh tawh dawn a, Euro­pean club te inelna sang ber group stage khel turin Liver­pool tan playoff bak pal­tlang a ngai tawh lo bawk.

Premier League club zingah Champions League nomawi chawi thei hnuhnung ber chu Chelsea niin title an lak ṭum hi kum 2012 daih tawh kha a ni.

Real Madrid leh AC Milan a enkawl laia UCL nomawi chawi tawh Ancelotti chuan, "Kum dang aiin Champions League hi a harsa dawn, United, City, Chelsea, Tottenham leh Liverpool te hi tawnhriat nei ṭha an ni a, elpui hautak tur vek an ni. Player thar an seng lut hnemin sum an hmang tam a, an boruak a lian dawn," tiin a sawi.

Bayern Munich hian kum 2013 khan Champions League nomawi an chawi a, hemi hnuah Pep Guardiola kaihhruaina hnuaiah semifinal vawi thum a an thleng a, season hmasa khan beisei an phak lo bawk. Bayern hian season khuh hawn nan Pathianni zan dar 6:00 hian Signal Iduna Park-ah Dortmund chu DFL-Supercup an khelhpui ang.