Harh tharna chang Liverpool khelmualah Magpies
Premier League match thum zet a zawna an chak zawh loh hnuah Bournemouth lakah Liverpool an inhri thla a, 9-0 ngawtin an chak. Newcastle United-in duhthlang thei ngat se tun dinhmuna Jurgen Klopp-a naute tawn loh hi an duh ang.
Mahse, duh thlan theih a ni lo a, zanin dar 12:30 hian Liverpool khelmualah Newcastle United an leng dawn - Magpies hi Manchester City nen 3-3 a inhnehtawk thei an nih avangin Liverpool tan dah hniam an rem lo.
Eddie Howe-a enkawlna hnuaiah Magpies-in hmuh theihin hma an sawn a, neitu thar hnuaiah sum an ngah bawk avangin Premier League 'Big Six' te el ngam ber tura ngaih an ni.
An kim lo
Liverpool-in hrem vangin striker man to Darwin Nunez an la chhawr thei dawn lo a, chuti a nih chuan Bournemouth laka goal hnih leh assist vawi thum neitu Roberto Firmino chu tlarhmaah Mohamed Salah leh Luis Diaz nen bul ṭan leh tur a ni ang.
Reds player zingah Diogo Jota, Naby Keita, Ibrahima Konate, Thiago Alcantara, Alex Oxlade-Chamberlain, Caoimhin Kelleher leh Calvin Ramsay te chu hliam vanga la chawl mek an ni a, mahse, Joel Matip leh Curtis Jones ten training an zawm leh tawh - Liverpool tan thu lawmawm a ni.
Matip leh Konate tel loin Liverpool tlarhnung a buai tih phat rual a ni lo a, Matip-a dam leh ta hi Klopp chu a lawm khawp ang. Chutihrual chuan Cameroonian centre back hian bul a ṭan nghal erawh a beiseiawm loh.
A hming Howe
Newcastle-in neitu thar an neih khan an thawm a ring takzet a, club-a share ngah ber Saudi Public Investment Fund chuan pound tluklehdingawn 300 chuang zet an neih miau avangin a awm lo hran lo.
Mahse, Magpies hian mipui barakhaihin coach langsar aiah Eddie Howe an thlang a, mahse, English coach hian hna a thawk ṭha hle - match 33 a kaihhruai tawhah vawi 15 hnehna chanpuiin, vawi riat draw an nei a, vawi 10 an tlawm.
Season hmasa an league match tawp pariatah khan vawi ruk an chak a, tun season-a league match li an khelhah an la tlawm lo bawk - chutihrual chuan match thum hi draw a ni a, match khatah chiah an chak.
Liverpool beiseina
Reds-in Anfield-ah Magpies an ngam viau - Premier League match-a Magpies laka an tlawm hnuhnung ber chu April, 1994 kha a ni tawh a, match 26-ah vawi 21 chakin, vawi nga an draw. Liverpool hian Magpies lakah Premier League goal 109 zet an khung tawh bawk a, PL-ah heti zat goal khung theihna club dang an nei lo!
Chu mai a ni lo - Liverpool lawmna belhchhah turin Magpies-in pound maktaduai 60 bawra an lakluh Alexander Isak an chhawr theih dawn leh dawn loh a la chiang lo a, work permit a neih hman chuan a inlan thei ang, tih chauh a ni.
Magpies tan hliam tenau vangin Bruno Guimaraes a la inlan thei dawn lo a, Callum Wilson chawlh a la ṭul a, Allan Saint-Maximin leh Kieran Trippier pawh inlan lo thei dinhmunah an ding mek - Reds tan chuan duhthusam a ni.