Number 1 Medvedev a chak

US Open an khel ṭan a, mipa singles number 1 leh seeded pakhatna ni bawk Daniil Medevedev chuan a match hmasa berah tualchhung player Stefan Kozlov chu 6-2, 6-4, 6-0 in a hneh nghal.

Russian tlangval hian hnehna chang turin hun a mamawh tam lo, darkar hnih leh minute khat chhung lekin American player hi a hneh. Player pahnih hi an naupan laia inkhel tawh ṭhin an ni a, junior huangah chuan Medvedev hi a che fuh lo zawk a ni ṭhin.

Kum 26 mi Medvedev chuan, "Tun hma chuan hneh theih loh ang mai a ni ṭhin, tun ṭuma ani ka hneh thei hi ka lawm hle," tiin a sawi, a naupan laia a ṭhianpa hi tunah chuan world number 111 a ni a, an dinhmun a inthlau ta hle.

Medvedev hian a match lehpekah chuan Arthur Rinderknech a hmachhawn dawn. Indo buaina vangin Wimbledon khel thei lo mah se, Grand Slam pali zinga a hnuhnung ber US Open-ah hian champion ngei a tum ang.

Inkhel dangah Stefanos Tsitsipas a tla. Seeded palina Tsitsipas hi world number 94 Daniel Galan lakah 6-0, 6-1, 3-6, 7-5 in a chak lo. US Open khel player zinga panga chu world number 1 ni chunga season khar thei an ni a, mahse chung zinga pakhat Tsitsipas chuan a thei dawn ta lo.