LPS Pro Fight ; Zaninah inhnek 10 a awm dawn

Tata Yodha 4x4 LPS Professional Fight chu zanin dar 8:00 aṭang hian R. Dengṭhuama Indoor Stadium, Mualpuiah khelh ṭan a ni dawn a, a zan khatnaah hian inhnek 10 a awm nghal dawn a ni.

LPS Promotional Fight hnuhnung ber 2019 khan Mizo boxer 194 bakah, state ṭhenawm Arunachal Pradesh, Meghalaya, Manipur, Assam leh Sikkim aṭanga sawm bik 12 nen, an vaiin boxer 206 an tel, tun ṭumah hian boxer 211 an inlan dawn - a hmasa aiin an tam zawk.

Inelna tir lamah hian tawnhriat la nei lo, tualchhung boxer chhuak tharte an inhnek hmasa dawn, round sang lamah tawnhriat nei leh boxer ṭhate an inlan thung ang, a tir lamah an inthlifim hmasa dawn tihna a ni.

Mipui hmuh chak, tawnhriat nei ṭha Vanlalawmpuia (Khuangthing), F. Zoramchhana (Cherhlun), C. Lalhruaitluanga (Chawngtlai) leh HC Lalramfela (Chawngtlai) te pawh an inlan dawn a, round sangah a hmuhnawm leh zual dawn.

Tun ṭumah hian weight hrang pangaah title an inchuh dawn a, fly (kg 48-52)-ah 75, bantam (kg 52-55.3)-ah 36, feather (kg 55.3-59)-ah 48, light (kg 59-63.5)-ah 32 leh welter (kg 63.5-70)-ah 20 an tel a ni.

Pro Fight organising secretary mi Thangkhuma (T-a) chuan, "Harsatna neuh neuh karah beisei aia tam boxer an inlan dawn, infiammite an phurin hlawhtling taka inelna kan buatsaih theih kan beisei," tiin Vanglaini a hrilh