Ball khawih tlem, goal khung thei Haaland!

Premier League-a a season hmasa bera tlangnel nghal em em mai Erling Braut Haaland chu Pep Guardiola-a'n Manchester City a enkawl hnua City player zinga chawhruala ball tawk tlem ber a ni!

Haaland hian Premier League match-ah minute 90 chhungin vawi 24.6 zel ball tawk fuh ang a ni a, amah hnaih deuhtute chu Ederson, Willy Caballero leh Claudio Bravo an ni - an vai hian keeper an ni, tih hriat a ṭha.

Mahse, Pep Guardiola chuan a player hi chhanin, "Ball a tawk tam lo a ni mai thei a, mahse, goal khungna kawngah a inrawlh zel a ni," a ti a, a thusawi ṭawmpui loh a harsa.

Haaland hi box chhunga hun hmang chi a ni a, City khelh ṭhin dan nen a inang lo hle - mahse, ball a chan chhunah a hlauhawm a, goal khungna chance nei tura a veh kual thiam dan leh a che vel chu hmuhnawm a tling bawk.

Kum 22 mi striker hi City tan Premier League match li an khelh tawhah a inlan vek a, goal ruk a khung tawh - Bournemouth lakah tih lohah chuan goal a khung vek a, match hnuhnung berah phei chuan Crystal Palace lakah hattrick a siam.

Manchester City hian zanin dar 12:00-ah Premier League match an khel leh dawn a, Nottingham Forest an mikhual ang - Haaland hian en bik a hlawh leh dawn.

Hetihlai hian City fan-te tan chanchin lawmawm hriat tur a awm a, tun hnaia Barcelona nena sawi zawm hlawh reng Bernardo Silva chu a chhuak dawn lo tih City boss Pep chuan a tichiang.

Spanish manager Pep chuan, "Manchester City-ah Bernardo Silva a cham dawn, a chiang tawh. Bernardo hi position pathum aṭanga pangaah a khel thei a, a pawimawh em avangin thlak theih a ni lo," tiin a sawi.

Silva hian league-a City match hnuhnung pahnihah goal a khung ve ve - Newcastle United nen an inhnehtawk ṭumin an draw-na goal pawimawh a khung a, Crystal Palace laka 2-0 a an hnufual laiin an comeback theih nana City tana goal khung hmasa ber a ni bawk.