Conte-a'n champion theih a inring lo

Tottenham Hotspur manager Antonio Conte chuan Premier League nomawi beisei tur chuan an nghah hret a la ngaih thu a sawi a, "Transfer window vawi hnih tal la hman leh a ngai ang," a ti.

Spurs-in season bul an ṭan ṭha hle - league match li khelh tawhah Chelsea nen 2-2 in an in draw tih loh chu an chak vek a, champion lai Manchester City nen point 10 ve ve an hmu mek.

Mahse, Conte chuan, "Season hmasa nena khaikhin chuan hma kan sawn tih inhmu ang. Mahse, team dang anga top level-a awm tur chuan hun, dawhtheihna leh transfer market kan la mamawh.

"Vawi hnih tal transfer hmachhawn leh phawt kan ngai," a ti a, a duhthusamin squad a la din lo - Spurs hian tun nipui transfer-ah Ivan Perišic, Fraser Forster, Yves Bissouma, Richarlison, Djed Spence leh Clément Lenglet (loan) te an lalut tawh.

Conte hian Ningani zana transfer bazar tawp hmaa player dang lakluh chungchangah club board a titipui tawh a, Italian coach chuan, "Player kan lalut emaw, lalut lo emaw, kan tan buaina tur a awm lo," a ti.

Thla thar aṭanga Champions League khel tur Conte chuan sawi zawmin, "Ni thum dana match kan khelh a ngaih ṭhin dawn avangin player pawh thlak danglam a ngai fo fawn a, chumi hrethiam tur chuan player-te pawh an fing tawk tur a ni.

"He hun hi club tan pawh kan complete tak tak leh tak tak loh hriat a, a aia ṭha zawka kan tih theih dawn leh dawn loh hriatna hun ṭha tak a ni," a ti.

Spurs hian zanin dar 12:15-ah West Ham an lenchilh dawn a, Aston Villa laka chak hlim Hammers laka hnehna chan hi thil awlsam a ni lo ang.

West Ham hian an phurna belhchhah turin Brazil midfielder Lucas Paqueta chu an club player man to ber ni turin an lalut a, kum nga chhung atan contract an ziahpui.

Lyon aṭanga lakluh Paqueta manah hian West Ham chuan pound maktaduai 36.5 an inseng a, a khelh ṭhat dan a zirin a man hi £50mtd thlenga sang chho thei tur a ni - kum 2019-a Eintracht Frankfurt aṭanga £45mtd-a striker Sebastien Haller an lakluhna man zat kha a khum dawn tihna a ni.

Kum 25 mi Paquetá hian an ram club Flamengo aṭangin a hming a chher a, January 2019 khan AC Milan zawmin, September, 2020 khan Lyon hi £17mtd-in a zawm.

French club-ah a hming chherin, match 80-a khelhsakah goal 21 khungin assist vawi 14 a nei a, Brazil tan vawi 33 inlanah goal sarih a khung.