Serena a chak laiin Halep a tla nghal

Serena Williams chuan US Open a mangṭhana bul a ṭan chho a, a match hmasa berah Danka Kovinic chu a hneh phawt. Player langsar leh champion tura rinkai zinga mi Simona Halep erawh hneh nei loin a zinkawng a tawp nghal.

Tournament zawh huna chawlh tum Serena hian, darkar khat leh minute 40 chhungin Kovinic hi 6-3, 6-3 in a hneh a, a match lehpekah chuan seeded pahnihna Anett Kontaveit a hmachhawn leh ang.

Tawnhriat ngah Serena hian tun hmain ram hrang hrang 48 zeta mi player a hneh kual tawh, mahse Montenegro mi kher chu tun ṭum hi a hmachhawn vawi khatna a ni a, a sulhnu ropui belhchhah turin hnehna a chang leh ta tho.

Hnehna chu
Arthur Ashe Stadium-ah fans 29,402 an ṭhu khat tlat a, an vai deuhthawin Serena ṭantu an ni. A ball vuak hmasa ber aṭanga a tawp ber thlengin fans thawm a ṭha takzet a, thlawpna a dawn ṭhat avangin atan inkhelh pawh a nuam zual ang tih a chiang.

Kum 40 mi Serena chuan, "Stadium chhunga ka rawn luh chiah aṭang khan engkim mai kha duhthusam a ni, min thlawp tlattute hmaa inkhelh hi chu engtik lai pawhin a nuam, a boruak kha ka tasak hian a takin a hre veng veng thei hial.

"Hetiang hun hi chu ka theihnghilh ngai tawh lo ang," a ti. American star hian Grand Slam champion hnem lamah Margaret Court (24 titles) chauh tluk loh a nei, tun ṭumah hian a champion a nih chuan Australian legend hi a nihrual ang.

Hmabak Kontaveit
Inkhel dangah Anett Kontaveit chuan harsa lo takin Jaqueline Cristian chu 6-3, 6-0 in an sawp a, match hmasa bera a hneha a chan aiin a khelh hmabaka Serena nen an inhmachhawn tur chuan ngaihven a hlawh zawk hial.

Kum 26 mi Kontaveit chuan, "Ka hmaah tunge ding dawn tih ngaihtuah vak vanga buai tur ka ni lo, tu pawh hmachhawn ni ila nuamti taka khelh mai kha ka duh dan a ni. Ka tan chuan Serena hmachhawn hi a hlu dawn, a bik takin a hun hnuhnung a nih vang a ni," a ti.

Serena hian US Open vawi 20 a khel tling tawh a, second round-ah chak loh a nei ngai lo. New York khawpuiah ṭantu a neih ṭhat avangin player dang tan hmachhawn a châkawm lo, seeded pahnihna Kovinic tan pawh hna a hautak khawp ang.

Mangṭha Halep
Simona Halep tan US Open hi hmun ṭha a la ni thei lo chhunzawm zel. World number 1 hlui hi Daria Snigur lakah 6-2, 0-6, 6-4 in a chak lo, chak ngei turin set thumnaah a dinhmun a ṭha hman, mahse 5-1 zeta a san fal tawhna chu a hum zo lo.

Romanian star hian French Open leh Wimbledon title a la tawh a, Australian Open pawh final a khel tawh. US Open-ah erawh 2015 khan semifinal a thleng ve zuai a, a bak chu thlen san a nei teh vak lo - atan New York khawpui hi a nuam viau lo ang.

Inkhel dangah player beisei awm Coco Gauff chuan Leolia Jeanjean 6-2, 6-3 in a hneh a, hnehna chang tur hian darkar khat leh minute 19 bak a mamawh lo. American tleirawl hian a match lehpekah chuan Elena-Gabriela Ruse leh Daria Saville inkhela chak zawk a hmachhawn dawn, an ramah hian a sang thei ang thlen a tum ang.