Cavani-a'n Valencia a zawm

Uruguayan forward Edinson Cavani chuan La Liga club Valencia a zawm a, Spanish club hian Thawhṭanni zan khan an player hi an tlangzarh. Kum 35 mi Cavani hian kum hnih daih contract a ziak.

El Matador tiha hming lem an pek Cavani hian kum 2020 khan PSG aṭangin Manchester United a zawm a, English club tan hian season hnih chhungin league match 41-ah goal 12 khungin contract a pawtsei lo.

Thawhṭanni zan khan Valencia-in Mestalla Stadium-ah Atletico Madrid an mikhual a, Cavani pawhin inkhel hi a en. Uruguayan forward hi Real Sociedad-in Newcastle United pan ta Alexander Isak thlak nan an hel a, Valencia pa na thlang ta zawk.

Spanish club hi Gennaro Gattuso-a'n a enkawl a, match hnih khelhah vawi khat chiah la chakin point thum an hmu tawh a ni. Season liam ta khan manager Jose Bordalas hnuaiah an khel a, league-ah pakuana niin Copa del Rey-ah final an thleng.

Nipui Transfer Bazar a tawp hnai
Nipui transfer bazar hi June 10 aṭang khan hawn ṭan a ni a, September 1, 2022-ah khar a ni dawn.

Premier League
England-ah chuan anmahni hunah September 1, Ningani zan dar 11:00-ah khar a ni dawn. Keini hunah chuan September 2, Zirtawpni zing dar 3:30-ah a tawp thung ang.

La Liga
Spain-ah chuan club-in player lalut fel turin September 1, zan dar 10:59 thleng hun an nei. India sanaah chuan September 2, zing dar 3:29-ah a tawp ang.

Serie A
Italy-ah pawh September 1, Ningani zanah transfer a tawp ang.

Bundesliga
Germany-ah September 1, tlai dar 5:00-ah an khar fel dawn a, keini hunah chuan zan dar 9:30-ah an khar ang.

Ligue 1
France-ah chuan transfer hun hi September 1, zan lai dar 11:59-ah a tawp dawn a, keini hunah chuan zing lam dar 4:29 a ni daih dawn.