YAYYSIA CUP

Pathianni tuk zing khua a lo var a. Delhi leh Mumbai kawtthlerah mipui an zi nuai nuai tawh a, Islamabad leh Lahore khawchhungah Pakistan flag chu in tinin an tar ta emaw tih mai tur a ni.

Holiday a ni a, chu kartawp chhuṭi tihlu zualtu chu - tlai lam thim hlima India leh Pakistan te Dubai International Stadium-a an inchalhtauh tur kha a ni tlat.

A bon
TV pangngaia Telecast right neitu Star Sports leh khawvel hmun hrang hranga Broadcasting network-te ratings hre hman ta chiah lo mah ila, hemi zana digital network hmanga inkhel en ringawt pawh hi, India lam Disney Hotstar leh Pakistan lam Daraz App te belkhawm hi mi vaibelchhe hnih leh a chanve ang vela chhut an ni.

Chutah inkhel dang zawnga fakna second 10 ṭum khat inlan atan, Star Sports lamin cheng nuai 4-5 vel an chhiar chu, hemi zan inkhel atan chuan a let thuma tipungin cheng nuai 17 a kai chho a, company leh sumdawng hrang hrangin an la inchan chuang lo.

T20 hmuhnawm bik
Ṭhumvawra vannei India kaptan Rohit Sharma-a'n vawm hmasak a thlang a, Pakistan mi hlauhawm pahnih Mohammad Rizwan leh Babar Azam an rawn pen chhuak. Over khatna aṭangin thil pakhat a chiang.

Dubai International Stadium pitch chu sawh dan chi hnihin (double pace) a khawsa dawn tih a hriat a, 180-190 runs siam tum aiin 150 runs vel hi target ṭha tak a ni dawn tih Pakistan lamin an hai lo.

Kaptan Babar Azam a thi hma chuan India mipui tluklehdingawn chuang a thawk tir huai. Jasprit Bumrah tel lo lang lo khawpin Hamara Desh bowler-te an vawm ṭha a, inhliam hnua a rawn let leh hnua harhtharna chang all rounder Hardik Pandya a langsar fal kan ti lo thei lo ang.

India hun
India batting line-up han thlir chuan run 148 lek (?) um tur chuan, huhphurh awm loh ang takin a lang. Chuta karah Pakistan ball vawm specialist Shaheen Afridi a la awm lo zui.

Mahse kum 19 mi Naseem Abbas Shah chuan kaptan Azam aṭangin lukhum hmasa ber a dawng a, India meuh a hmachhawn chungin a zam lo.

Naseem Shah hi tui mai ni lo, meialh hmanga baptisma chang a ni ber a; India superstar KL Rahul leh Virat Kohli te ho a hre ve lo emaw tih mai tur a ni. Pakistani bowler hian ball kawh taka vawmin a kawi zawk zawk mai a, India superstar ho an buai hle.

KL Rahul tan a ball vuak chhung aiin a insiam chhung a rei zawk a, kaptan Rohit-a'n pitch ball sawt inang lo a chhut sual a, hun rei tak hnuah khel ṭha mah se Kohli-a'n a standard a la pha lo. Indian batter hoin Pakistan fielder-te ball man practice an pe a ni ber e.

Tactical & Technical
India lam hian vei zawnga ball vua, Shikhar Dhawan a hruai tel loin Rishabh Pant te an khelh tir bawk si lo a, Pakistan lam left arm spinner leh leg break bowler Shadab Khan leh Mohammad Nawaz a te tuk dai turin all- rounder Ravindra Jadeja chu no. 4-ah an kaisantir.

India camp lam game plan 'technical' zet hi Babar Azam-a ten an hmu lawk loin niin a lang a, Babar hian a game plan-ah a ngaihtuah tel lo niin a ngaih theih. Chakna hun nei ṭha Pakistan lam hnungtawlhna inṭanna a ni ta a, a tawp lama all rounder Hardik Pandya ball rawn hlap nen, rin ai takin India zawk hian an awlsam ta a nih kha.

Wicket tam zawk kha pace bower ho lak a ni a, short ball deuh vek a ni. Dubai pitch-ah hian ball hi a sawh hnuah a muang hret a, batsman tan ball vuak thiam a har. Hemi vang tak hian Pakistan laka India ruahmanna (strategy) hi a ṭha a, tun tournament kalphung a ni dawn em, tih erawh hunin a hril ang chu.

Part II leh III
Tun Pathianni, Asia Cup-a India leh Pakistan intum kha, ṭum thum intum theihna hun an neiha a khuhhawnna lek a ni thei. Super 4 (Semi final) leh final-a intawng leh tura beisei ber an ni nghe nghe.

India leh Pakistan te hian Hong Kong an hneh chuan Super 4 an lut ve ve dawn a, group dang aṭanga rawn lut team pahnih nen vawi khat ṭheuh an inkhel kual ang. Rohit leh Babar-a hote hi Super 4-ah an intum leh ngei hmel a, final-ah intum theih dan a la awm bawk.

Asia Cup-ah part I an khel tawh a, part II leh III a la awm thei bawk. Tin, ICC T20 World Cup, Khuangchawi thla tahrik ni 23-ah Melbourne khawpuiah an intum leh dawn bawk tih kha theihnghilh loh a ṭha bawk.

Engtin zel?
Zanina Hamara Desh leh Hong Kong intum tur hi chu thailan vak tur a awm lo. High Sikul leh Primary Sikul naupang infiam ang deuh a nihna chen a awm awm e. Chutihrual chuan India batting line up hi lehkha a hming lian hlir intlar thla duah si hi, nghin ve leh zeuh an ching ṭhin.

Kaptan Rohit Sharma hian a ṭhianpa Jadeja hi under 17 level chho aṭanga a lo hriat chian tawh a a ni a, T20-ah bik hi chuan batting all-rounder anga chhawr mai hi a fin thlak zawk ang em? India pace attack la patuai ve takte hi, stage sangah eng nge an an ang? tihte leh Duleep Trophy leh Mizoram Cricket rahbi thar leh a meichher kengtute chanchin a lehpekah thailan kan tum dawn nia.