PSG-in Fabian Ruiz an la dawn

Paris Saint-Germain chuan Napoli aṭangin Fabian Ruiz an la dawn. Spanish midfielder Fabian nimin khan Paris a thleng a, he thu i chhiar meuh chuan PSG player a ni tawh hial ang.

Kum 26 mi Fabian man hi euro maktaduai 22 vel tura ngaih a ni a, June 2027 thleng daih contract a ziak ang.

An mamawh em?
PSG hian Trophee des Champions-ah Nantes 4-0 a hnehin season bul an ṭan a, Ligue 1-ah Clermont Font (5-0), Montpellier (5-2) leh Lille (7-1) te an sawp hnuin Monaco nen 1-1 in an inhnehtawk.

PSG hian midfield-ah Marco Verratti an kawl a, Italian midfielder hian hmun pawimawh a la chang reng dawn. Chutihrualin Spanish midfielder Ander Herrera leh Dutch midfielder Georginio Wijnaldum te an chhuahtir a, an aiah Vitinha leh Renato Sanches te an lalut tawh.

FC Porto aṭanga euro maktaduai 41.5 senga an lakluh Vitinha hi kum 22 mi chauh a la ni a, 2020–21 season khan loan hmangin Premier League club Wolves-ah pawh a lo khel tawh a, Portugal tan vawi thum a khel tawh.

Renato Sanches hi euro maktaduai 10 chauhin Lille aṭangin lalut mah se sulhnu a nei ṭha. Portugal-in Euro 2016 an champion theih nana player pawimawh a ni a, Bayern Munich pawhin Benfica aṭangin man to takin an la chhhuak. Amaherawhchu Renato hi beisei anga a chet ṭhat zui loh avangin Lille-ah a kal a, Ligue 1 hial a champion pui avangin PSG-in an lalut hi a mak hran lo.

PSG hi Ligue 1 champion turin an midfield hi ṭha tawk mah se Champions League nomawi chawi tur chuan a la ṭha tawk lo. Hemi a nih avangin Fabian Ruiz hi an mamawhah a chhal theih. Ke vei lama pet Fabian hi thahrui ngah tia sawi tur ni lo mah se player fing, hawi zau leh ball pass thiam a ni a; formation hrang hrangah midfield laiah a chhawr tlak avangin manager Christophe Galtier pawhin a hman ṭangkai viau a rinawm.

Kar laihawl inkhel
Zanin hian Ligue 1 inkhel a awm dawn a, PSG-in dar 12:30-ah Toulouse an hmachhawn ang. French champion hian match hnuhnung bera Marseille nen an inhnehtawk avangin khualmuala khel tur ni mah se chiang taka chak an tum a rinawm.

French club tan tun season-ah Neymar a la langsar ber a, match li a khelhah goal sarih a khung der tawh. Brazilian forward hian Ligue 1 bikah pawh match thum lekah goal nga a khung. Neymar kawppui Kylian Mbappe-a'n league match hnihah goal li a khung a, Lionel Messi-a'n league match thumah goal thum a khung bawk.

PSG tlarhmaah Messi, Neymar leh Mbappe te an awm thei a, season tir lamah boruak ṭha lo a awm niin sawi mah se 7-1 a Lille an sawp ṭumin khelmual chhungah buaina an nei niin a lang lo. Toulouse lakah pawh MSN te bawk hi a hmuhnawm ang.