India hmaah Hong Kong

Asia Cup 2022 (T20)-ah India-in an match hmasa berah Pakistan an hneh a, inkhelin ngaihven a hlawh hle. Zanin dar 7:30 hian Dubai International Stadium-ah India-in qualifier aṭanga tling Hong Kong an hmachhawn dawn a, team pahnih an inthlauh deuh avangin ngaihven a hlawh tawk lo.

Hong Kong hi cricket ram ropui ni lo mah se kum 1969 khan International Cricket Council chuan associate membership nihna an pe. Kum 1982 khan ICC inelnaah qualifier an khel a, beisei angin thil a kaltluang zui lo. Cricket khawvelah Hong Kong an reh vang vang a, kum 2004 khan Asia Cup (ODI) ah an rawn inlan leh a ni.

Cricket ram lian lakah Hong Kong hian result ṭha an la nei lo. Chutihrualin T20 erawh vawi 52 khel tawhin vawi 21 an chak a, vawi 31 dangah an chak lo. ODI pawh vawi 26 khel tawhin vawi kua an chak a, vawi 16 chak loin vawi khat dangah erawh result a awm lo.

India leh Hong Kong erawh ṭum hnih an inhmachhawn tawh a, kum 2008 khan Men in Blue hian 256 runs ngawtin an hneh. Kum 10 hnuah team pahnih hi ODI-ah bawk inhmachhawn lehin Hong Kong hi 26 runs chauhin an chak lo.

An inkhel tawhna pahnih thlirin team pahnih inkar zim deuh tawh mah se thilmak danglam tak a thleng a nih ngawt loh chuan Hong Kong tan chak a beiseiawm loh a ni.

Group A
August 28, Pathianni
India (148/5) bt Pakistan (147)
India wicket ngain an chak

August 31, Nilaini
India 7:30 PM Hong Kong

September 2, Zirtawpni
Pakistan 7:30 PM Hong Kong