Club nei lo Ross Barkley

Chelsea chuan midfielder Ross Barkley nen inbiak remna an neih hnuah club a chhuahsan thu an puang. Kum 28 mi Barkley hian England tan match 33 khel tawh mah se ram tan hian kum 2019 hnuah a la khel leh lo a, tun season-ah Thomas Tuchel-a'n a la chhawr lo bawk.

Barkley-a'n Blues tana a inlan hnuhnun ber chu season liam ta match hnuhnung ber kha niin Watford 2-1 in an hneh a, minute 90-naah chakna goal a khung. English midfielder hian January 2018 khan Everton aṭangin pound maktaduai 15-in Chelsea hi a zawm a, beisei angin Stamford Bridge-ah hming a chher thei lo.

Chutihrualin Barkley hian Premier League-ah Chelsea, Aston Villa (loan) leh Everton tan match 232 a khel a, goal 29 khungin assist vawi 28 a nei bawk.