Wolves-in Kalajdzic lalut dawn

Wolverhampton Wander-ers chuan VfB Stuttgart aṭangin striker Sasa Kalajdzic an lalut dawn a, German club nen hian pound maktaduai 15.4-in an inrem - a khelh ṭhat dan a zirin a man hi pek belh leh tur a ni ang.

Wolves-in 1-1 a Newcastle United an inhnehtawkpui hnu lawkah, manager Bruno Lage chuan Raul Jimenez elpui tur a duh thu a sawi a, club thuneitu lamin an Coach duhna hi ngaih pawimawh sakin Kalajdzic an lalut dawn ta - he thuziak i chhiar meuh chuan an inrem fel tawh hial mai thei.

Austria international Kalajdzic hian an ram club SR Donaufeld Wien aṭanga a career ṭanin, Admira Wacker tan a khel leh a, July 2019 khan Stuttgart hi a zawm.

Stuttgart a zawm lai hian second division club an ni a, season tharah Bundesliga kaipuiin, German top division-a a season hmasa berah match 33 khelin goal 16 a khung.

Kalajdzic hian season hmasa khan hliam vangin league match 15 chiah a khel a, heti chung hian match 15-ah goal ruk khungin assist vawi hnih a nei - tun season-ah match thum a khel tawh a, goal la khung lo mah se assist vawi thum a nei.

Kum 25 mi Kalajdzic hian Pathiannia Cologne nen an inkhelh dawn khan Stuttgart thuneitu lamah inlan loh a lo dil tawh a ni.

Hetihlai hian Wolves centre back Willy Boly chuan Nottingham Forest a zawm hnai a, inremna erawh he thu buatsaih lai hian a la awm lo - Magpies nena an inkhelh ṭum khan Boly hian chhuah a duh avangin squad a zawm duh tawh lo.

Wolves striker Patrick Cutrone chuan Molineux a chhuahsan bawk a, Italian Serie B club Como chu kum thum chhung atan a zawm - a chawr chhuahna khaw club a ni.