Fulham-ah Willian a khel dawn

Brazil midfielder Willian chu Premier League-ah a kir hnai a, English top flight league-a kai thar Fulham a zawm dawn - kum 34 mi ni tawh mah se ani ang player langsar lakluh theih hi Fulham tan chuan thil lawmawm a ni.

Chelsea-a hming chher, Arsenal-a beisei phak ta lo Willian hian Gunners tan season khat chiah a khel hman tihin, August 2021 khan Corinthians a zawm a, mahse, social media lamah thaha vauna a dawn thu sawiin Brazilian club-a a contract neihlai chu thlatir khan a titawp.

Willian hian Fulham-ah medical nei turin ruahmanna kalpui vek a ni tawh a, Corinthians-a a contract a tihtawp tawh avangin transfer window inkhar hunah pawh Fulham hi a zawm thei ang.

Brazil tan vawi 70 inlana goal kua khungtu Willian hian Corinthians aṭangin a professional career a ṭan a, Ukraine club Shakhtar Donetsk leh Russian club Anzhi Makhachkala tan a khelh hnuin, August 2013 khan Chelsea a zawm.

London club-ah season sarih a khel hman a, match 339-ah goal 63 khungin assist vawi 62 a nei a, August 2020 khan Arsenal chu kum thum chhung atan a zawm. Gunners tana a match hmasa ber hi a club thar tur Fulham lakah hian a khel.

Mahse, London club tan match 37-ah goal khat chiah khungin, assist vawi sarih a nei a, beisei a phak loh avangin Corinthians-ah a kir a, Brazil Serie A club tan match 45 khelin goal khat chiah a khung a, assist vawi nga a nei thung.

Willian hian Chelsea tana a khelh laiin Premier League (2), FA Cup (1), League Cup (1) leh Europa League (1) nomawi a chawi hman a ni. Brazil tan kum 2019 khan Copa America nomawi a chawi bawk a, mahse, 2019 hnuah ram tan a inlan leh tawh rih lo.