Harsatna paltlang a ngai - Juve coach

Juventus coach Massimiliano Allegri chuan hliam vanga an harsatna tawh chu an paltlang a ngai tih a sawi, an insiamṭha thuai a nih loh chuan season hmasa ang bawk khan Old Lady tan Serie A nomawi ban phak a ni lo ang.

Turin club hian league match thum an khelh aṭangin point nga an hmu a, table-ah pariatna an ni. An chungah team an awm tam a, chutihrualin match khat lekah pawh an dinhmun a la inthlak kual thei tho bawk.

Hliam vangin Paul Pogba, Federico Chiesa, Kaio Jorge leh Angel Di Maria te an chawl mek a, defender tawnhriat nei ṭha Leonardo Bonucci chuan nimin khan training zawm thei mah se, a dinhmun endik nawn leh a la ngai dawn.

Juve manager Allegri chuan, "Pre season aṭangin hliam kan nei ṭan a, season bul kan ṭan chauha midang an hliam belh leh bawk. Inhliam hi football ken tel a ni tih chu kan hria, chutihrualin team tana buaina thlen thei a ni tih pawh kan hre ve bawk.

"Player tumah hi duh vanga hliam an ni lo, an dam leh hun nghakhlel takin kan thlir. Kan squad a chhah viau a, tawnhriat nei ṭha sa bakah academy lam aṭanga rawn khel thei tur chi pawh an awm, anni ho nen hian hmalam kan pan theih ka beisei," tiin a sawi.

Juventus hian zanin dar 12:15 hian Spezia an mikhual dawn. Team pahnih hi tun hmain vawi 10 an inhmachhawn tawh, record nei ṭha zawk Juve hi vawk li chakin ṭum hnih chu an chak lo - vawi li dang chu an inhnehtawk thung.

Serie A hmahruaitu Napoli pawh an inlan dawn. Luciano Spalletti-a'n a player ṭha tam tak chân mah se season bul an ṭan fuh a, zanina an mikhual Lecce an hneh a nih chuan table chung berah an awm chhunzawm leh dawn a ni.