Barca-in Neymar chhuah an phal
Barcelona chuan Paris St-Germain nena sawi zawm hlawh mek an forward Neymar chu French club nen indawrna neih an phalsak a, beisei anga engkim a kaltluan chuan Brazil captain hian pound maktaduai 198-in Paris khawpui lam a pan dawn tihna a ni.
Brazil international hian nimin khan training-naah a ṭhiante a tlawh a, Catalan club hi chhuahsan a duh thu hrilh pahin thlahna thu a sawi. Hemi hnu lawkah hian Barca manager Ernesto Valverde chuan Neymar hi PSG nena inbiak phalna a pe a, a hmalam hun tichiang thuai turin a ti.
A man zat
Kum 35-a upa forward hi Barcelona-a a contract neih ang chuan, "Euro maktaduai 222 (pound maktaduai 198) a lei ngam an awm chuan a chhuak thei ang," tiin a inziak a, heti zat sum theh chhuak ngam an awm rin a nih loh laiin Arab sum bawm ring PSG an lo lang a, Barca-in tih theih an nei lo.
Neymar hian kum 2013 khan Santos aṭangin Barcelona hi a pan a, hetihlaia a man zat hi pound maktaduai 48.6 a ni. Kum 2016-ah khan chhuak tur anga sawi a awm reng chungin kum nga dang cham chhunzawm turin contract thar a ziak a, tunah erawh a contract ziah khan awmzia a nei dawn lo niin a lang ta.
Hlawh tur
Nimin khan Neymar-a agent Wagner Ribeiro chuan Paris khawpuia a awm thu twitter kaltlangin a tarlang a, a player hma hun chungchangah PSG nen indawrna an kalpui mek nia ngaih a ni. Ribeiro hian nikum khan Neymar hi PSG hian an club-a khel turin an lo sawm tawh niin a sawi a, hetih hunlaia French club-in Neymar thlem nana an hman chu kar khata £650,000 hlawhtir leh a chhiah pek tur pek sak a ni.
Nikuma PSG-in Neymar an dawrna zat hi kumina a hlawh tura an chhawp zat nen a danglam tam lo tura ngaih a ni heti zat hi a hlawh a nih ngat chuan footballer zingah Brazil captain aia hlawh hnem hi an awm lo ang. Tun dinhmunah Shanghai Shenhua forward Carlos Tevez chuan kar khatah £610,000 a hlawh nia sawi a ni a, ani erawh hi chuan a hlawh aṭangin chhiah a pe leh tih hriat tel a ṭul.
Pha mah se...
Tun hnaiah Neymar hi chhuak tur anga sawi thawm a awm reng a, mah se club president Josep Maria Bartomeu chuan an player pawimawh hi an chhuah loh tur thu leh an chelh tlat tur thu a sawi - tunah erawh engkim a lang chiang a, Neymar-a chhuah duh leh duh lohah engkim a innghat tawh.
Neymar hian Catalan club tan International Champions Cup pawh a la khel thlap a, mah se USA-a inelna neih zawhah squad dang ruala haw ve loin China lamah mimal sponsor chungchang buaipui turin a kal. Thawhlehni khan Spain-ah a kir a, nimin zingah club training zawmin a thusawi chu 'chhuah a duh thu' a ni.
Neymar sulhnu
Brazilian forward Neymar-a'n Barcelona-ah season li hun a hmang tawh a, inelna hrang hrangah match 186 inlan tawhin goal 105 a khung sak. La Liga (2), Copa del Rey (3), Spanish Super Cup (1), Champions League (1) leh FIFA Club World Cup (1) nomawi a chawi vek tawh a, Barca tan nomawi chawi loh a nei lo.
Neymar-a'n hlawhtlin theihna apiangah Barcelona a hlawhtlinpui tawh avangin 'chona thar' hmachhawn tura chhuah a duh hi a awm lo hran lo a, a sum dawn tur zat ngaihtuah tel phei chuan Paris khawpuiin a lung a len thar thut hi sawisel chi niin a lang lo.
Khelaifi kam chhuak
Paris Saint-Germain president Nasser Al-Khelaifi pawhin Barcelona forward chungchang hi a sawi a, a ṭawngkam aṭangin Brazil captain hi lakluh a inbeisei niin a lang. Al-Khelaifi chuan, "Vawiinah chuan Neymar hi Barcelona player a la ni a, mahse nakin zelah eng thil nge lo thleng dawn tih chu a la hriat ang," a ti.
Barcelona chuan PSG hi Neymar man atan pound maktaduai 198 an theh chhuak a nih chuan Financial Fair Play hmanga chhui tura hek an tum thu an lo sawi tawh a, La Liga president Javier Tebas chuan UEFA-in hma an la lo a nih chuan court-a an zualko tur thu a sawi bawk - heng zawng zawng hian Neymar lakluh an tumna kawngah PSG a dang zo lo.