MFA Futsal inziahluh theih

Mizoram Football Association hnuaia Futsal Committee chuan August 1 aṭang khan Futsal Registration a kalpui ṭan a, club eng emaw zat an in ziak lut tawh.

MFA hian team 16 awmna Mizoram Futsal League a buatsaih dawn a, heta tel tumte hi chuan veng/khua behchhah nei tur an nih bakah veng/khaw khat hmingin club khat zel a ni tur a ni. An awmna Village Council/Local Council in a pawmpui tur a ni bawk.

Futsal League-a tel tum tan entry fee hi Rs 1,000 a ni a, security deposit-ah Rs 10,000 dah a ngai bawk. Team 16 chauhin Futsal League hi an khelh theih dawn avangin playoff hmangin a khel thei tur hi September thlaah zawn a ni ang. Inelnaah hian August thlaa registration tihfel chin tan khelh theih a ni.

Futsal League-a tel kher tum lo tan pawh MFA hnuaiah hian inziah luh theih a ni a, heng team-te hi hian MFA hnuaia futsal inelna (Futsal League tiam loin) an hmachhawn thei ang.

Futsal inelnaah hian MFA leh District FA hnuaia football club-a player inziaklut zawng zawng tan tel theih vek a ni a, club phalna lak hmasak erawh a ngai.

MFA hian register player-te futsal inelna tel an phalsak rual hian an hriatpui loh futsal inelna erawh tel an phalsak lo. Season ṭantirh khan MFA hriatpui loh inelna hmachhawn player-te chu zilh an ni tawh a, a thleng nawn a nih chuan player-ten hremna na zawk an hmachhawn ang.

Hriat chian duh nei tan MFA Futsal Committee Secretary Malsawma Renthlei (9862825053) leh MFA marketing Officer Mark Lalduhsaka (9999176275) te hnenah emaw, MFA Office, City Park-ah zawh fiah theih a ni.