Chhun dar 12:15-ah Rhino Charge leh West Warriors

Great Sports I Day Football-ah vawiin chhun dar 12:15 hian point la hmu lo Rhino Charge leh Chanmari West te Lammualah an inkhel dawn a, point thum hmu tan semifinal kawng a inhawng ang.

West Warrior hian MFA Super Cup final thleng mah se an match hmasa berah nomawi inchuhnaa an hneh loh Chhinga Veng lakah an mualpho nawn a, an tlarhnung a phui lo.

Coach HC Zarzoliana chuan, "Rhino Charge kan hmachhawn hmain ni thum training-na hun kan nei a, kan hmang ṭhaah ka ngai. Kan khingpui tur team hi Chanmari nena an inkhel kha ka thlir a, team ṭha an ni a, vanduai theihna tur an ni," tiin Vanglaini a hrilh.

Chanmari West FC captain Lalnun­mawia a damlo a, forward Lalremruata pawh hman theih a la ni lo. West Warrior tana thu lawmawm erawh mamawh hunah forward chak ṭha H. Lallianzama chhawr theihin a awm dawn.

Army team Rhino Charge-in hahdamna hun nei ṭha mumal loin match hmasa ber an khel a, nimin khan a vawi khat nan Aizawlah training an nei bawk. Chanmari FC nen an inkhelh ṭum aiin Mizo player pariat awmna team hi an ṭhat tawh zawk a beiseiawm.

Rhino Charge manager leh coach ni kawp Major David Khojol chuan, "Kan player-te tan tun hi civil tournament hmachhawn theihna hun remchang a ni a, hei bakah hian Mizorama kan rawn kal chhan chu Mizo ṭhalai inkhelh thiamte tan sorkar hna an zawm theihna hun siamsak a ni. Kan team-ah hian Mizo ṭhahnem tak an awm a, football thiam tan sipaiah a luh theih tih hi Mizote hian hria se ka duh a ni," tiin Vanglaini a hrilh.

Army team boss hian an game chu 'tiki taka' nen a inhlat thu a sawi tel a, Mizote hmuh duhzawng tak ni lo mah se chak pui theih tur game plan an neih thu a sawi tel bawk.