Nomawi chawi tum Jurgen Klopp

Liverpool manager Jurgen Klopp chuan tun season-ah Premier League nomawi an chawi theih tur thu a sawi. Reds hian 2016-17 season kha duhawm takin bul an ṭan a, January-a hmahruaitu Chelsea aia an hniamna chu point ruk chauh a ni. Mahse, January leh February-ah Merseyside club hi league match khatah chiah an chak a, season a tawp meuh chuan Blues chu point 17 a phak loin palina an ni.

Jurgen Klopp chuan, "Sea­son tharah nomawi chawi tumin kan khel dawn a, tum nei mumal loa season bul ṭan kan tum lo. Kan hmachhawpte tih hlawhtlin ngei tumin theihtawp kan chhuah dawn a, chumi tur chuan player pawh kan nei ṭha thawkhatin ka hria," a ti.

Klopp chuan sawi chhun­zawmin, "Season hmasaah kha chuan kan vanduai ve deuh bawk a, tun season-ah chuan a hma aia ṭha zawkin kan khel thei tawh ang. Ruahman angin engkim a kaltluang turah ngai ila, hmasawnna tur pawh kan ngahin ka hre tawh lo," a ti a, inzir belh tur a tam tawh loh thu a sawi.

Liverpool hian Thawhlehni zan khan Audi Cup-ah Bayern Munich chu 3-0 in an sawp. Reds tan Sadio Mane leh Mohamed Salah-te chuan first half-ah goal an khung a, Daniel Sturridge chuan minute 84-naah goal class sang a khung ve leh bawk.

Bayern-in a chhanletna an neih theih loh avangin Audi Cup final-ah Reds an lut a, nizan zanlaiah khan Atletico Madrid nen inhmachhawn lehnghalin he thuziah a nih lai hian an result kan hre hman lo. Reds tan Sturridge chu goal a khung hnu lawkah a inhliam vangin lakchhuah a ngai a, ngaihtuahawm erawh a ni lo.

English striker hian hliam vangin season thum chhungin league match 46 chiah a khel a, Bayern laka lakchhuah a nih pawh hian hlauhthawnna a lian hman hle. Mahse, England international chuan, "Hliam na tak a ni hran lo a, diktaka sawi chuan ka thawhrim luat ka tuar lo ni berin ka hria," a ti.

Sturridge chuan sawi chhun­zawmin, "Training-na lamah ka thawkrim a, ka tlan tam em em bawk. Tlemin ka chau tawngkhawng deuh a, a bak insawiselna ka nei lo. Season lo awm tur hi phur takin ka thlir a, hun duhawm tak kan hman theih ka beisei," tiin hmalam hun eng takin a thlir.

Tute nge inlan?
BAYERN MUNICH (4-2-3-1): Ulreich; Rafinha, Martinez, Hummels, Alaba (Friedl 79); Tolisso (Vidal 70), Thiago (Sanches 21); James (Coman 62), Muller, Ribery; Lewandowski
LIVERPOOL (4-2-3-1): Karius; Alexander-Arnold (Flanagan 79), Lovren, Matip (Klavan 67), Moreno; Henderson (Grujic 67), Can (Lallana 46mins); Salah (Sturridge 67 (Solanke 87), Coutinho (Woodburn 79), Mane (Wijnaldum 46); Firmino (Kent 67)
Goal: Mane 6'; Salah 34'; Sturridge 84'