Chhinga Veng hmaah Chanmari ; Coach ṭha pahnih Thlanga leh Sanga te intawng dawn

Great Sports I Day Football-ah Chhinga Veng FC-in vawiin tlai 2:30 hian Lammualah Chanmari FC an hmachhawn dawn. MFA Super Cup champion Chhingcows leh MPL5 champion Chanmari inkhel tur hi a hmuhnawm dawn.

Quarterfinal

Chanmari FC-in Mizoram Police leh Rhino Charge an hneh tawh a, Chhinga Veng FC-in Chanmari West FC leh Police an hneh tawh bawk. Group stage-a match li khelh turah vawi hnih ve ve an chak tawh a, hei vang hian vawina chak zawk hian semifinal an lut dawn a, quarterfinal-ah a ngaih theih.

Team pahnih hi Group B aṭanga knock­out stage thleng pha tura ngaih a ni a, amaherawhchu vawiina chak lo zawk team erawh talbuai thei an la ni. Chanmari FC-in match hnu­hnung berah Chanmari West an la hma­­chhawn dawn a, Chhingcows khelh hma­bakah Rhino Charge an la awm bawk.

Thlanga leh Sanga

Chanmari FC-in MPL khel tura an inbuat­saih ṭan tirha an coach chu Lalsangzuala Hmar a ni. Sanga hnuaiah MPL1 Qualifier an khel a, beisei ang result an neih loh avangin head coach atan Lalchhuanawma (LCh-a) lakluh niin Sanga hian LCh-a a pui chhunzawm bawk.

MPL season hmasa ber tawp lamah Chanmari FC-in H. Vanlal­thlanga an lalut a, veteran coach hian LCh-a thlakin Sanga'n assistant coach hna a chelh zel a. Kum 2013 khan Thlanga leh Sanga te inkawp hian Chanmari FC chu MFA Cup, I Day Football leh MFA Super Cup-ah an champion a, inelna ngaihhlut ber MPL2-ah an champion bawk.

MPL3-ah Chanmari FC-in final-ah Aizawl FC penalty shootout-ah an hneh lo a, hemi hnu hian Thlanga'n club a enkawl chhunzawm lo. Sanga'n ama puala club enkawl ṭanin Bethlehem Vengthlang FC chu MPL club-a head coach a nihna hmasa ber a ni.

Sanga hian season khat chhung BVT a enkawl a,MFA Super Cup-ah a champion pui. Season liam ta khan Chanmari FC-ah kirin MPL-ah an champion. Season ṭha tak a hman avangin Sanga hian Mizoram team a enkawl a, Captain NM Gupta Trophy-ah champion mah se Santosh Trophy-ah erawh semifinal-ah penalty shootout hmangin West Bengal lakah an vanduai.

Silchara NM Gupta Trophy-a an champion ṭum hian Sanga hi best coach atan thlan a ni a, hemi ṭum hian, "Kan champion chungchangah hian Chanmari FC-a ka thawhpui ṭhin Sir Thlanga chungah thinlung takin ka lawm. Coaching-a hma ka sawn theihna tura Pathianin min pek a ni. Best coach ka nih hi Sir Thlanga tan ka hlan e," tiin amah chher hriamtu Thlanga a fak.

Tun season aṭangin Thlanga'n tualchhung football a rawn luhchilh leh ṭan a, tun hmaa a thawhpui ṭhin Sanga chu a vawi khat nan a hmachhawn dawn. Mizo coach ṭha pahnihin Mizo club ṭha pahnih an enkawl a, an inkhel hi a hmuhnawm khawp ang.

A danglam!

Chhinga Veng coach Sanga chuan, "Chanmari FC kan hmaah an awm a, inkhel dang ang tho a ni. Ka club hlui a nih avangin a danglam lo a, Sir Thlanga pawh inenkawl se ka tan chuan inkhel dang tho a ni," tiin Vanglaini a hrilh a, Chanmari coach Thlanga pawhin inkhel dang nen a danglamna a hriat loh thu a sawi.

Coach pahnihin a danglamna an hre lo tak tak a ni thei a, chutihrualin pressure tih nep nan hman an tum a ni thei bawk. Khelmual pawn lamah ṭhian ṭha tak ni mah se vawiinah erawh chak an duh ve ve dawn a, chak loh pawhin a nghawng chu match dang nen a inang thei lo.

Tun hmain Mizoram Police chu team ṭha leh ṭha lo tehna atan hman ṭhin an ni a, tun sea­son-ah erawh vawi riat chak tawh Chhinga Veng hi tehfung atan hman theih an ni. Chanmari ṭhat leh ṭhat loh hi Chhinga Veng aṭanga teh a ni dawn a, MPL champion hian tehna paltlang ngei an tum ang.

Engtin zel?

Chanmari coach Thlanga chuan, "Chhinga Veng hi team ṭha tak an ni a, coach ṭha tak an nei bawk a. Keini aiin an puitling zawk a, kan fimkhur a ṭul a ni. Chutihrualin mimalin tumah kan veng dawn lo a, goal venhim kan tum ang a, goal khung kan tum bawk ang," tiin chak an tum thu a sawi.

Chhinga Veng coach Sanga pawhin, "Chanmari hian Police lakah goal an chhuah lo a, tun inelnaa goal an la chhuah loh laiin keini chuan Police lakah ringawt pawh goal hnih kan chhuah. Chanmari hi an ṭha a, kan tlarhnung tan mutthluk a thiang tawh lo," tiin fimkhur a ṭul thu a sawi ve bawk.

Chhingcows-in forward Mal­sawm­­fela'n match hnihah goal thum a khung leh der tawh a, MS Dawng­liana, Lalkhawpuimawia leh R. Malsawmtluanga te hoin Chanmari tlarhnung chhut pawp an tum dawn.

Match thum chhung a zawna goal nga khung tawh Chhinga Veng lakah Chanmari FC-in goal venhim an tum dawn a, defender C. Lalrosanga leh keeper F. Lalmuanawma ten hna hautak an hmachhawn ang.

Group B - Team Dinhmun
July 29, Inrinni - Rajiv Gandhi Stadium
Chanmari FC 4 - 0 Mizoram Police FC
CFC : PC Zosangliana 4', 49'; Jacob Vanlalhlimpuia 20'; C Lalrosanga 53'
Chhinga Veng FC 5 - 1 Chanmari West FC
CVFC : Malsawmfela 9'; MS Dawngliana 45'; Lalmawizuala 47' (OG); Laldampuia 69', 83'
CWFC : Lalnunmawia 30'
August 2, Thawhlehni - Lammual
Mizoram Police 2 - 5 Chhinga Veng
MPFC : Lalfakawma 3'; B. Zoramthanga 10'
CVFC : Malsawmfela 21', 76'; R. Laldinliana 52'; MS Dawngliana 62'; Lalkhawpuimawia 79'
Rhino Charge 0 - 1 Chanmari FC
CFC : Vanlalbiaa Chhangte 43'
Vawiin inkhel tur - Lammual
12:15 PM Rhino Charge vs Chanmari West FC
02:30 PM Chhinga Veng FC vs Chanmari FC
August 5, Inrinni - Lammual
12:15 PM Chanmari FC vs Chanmari West FC
02:30 PM Mizoram Police FC vs Rhino Charge
August 8, Thawhlehni - Lammual
12:15 PM Chhinga Veng FC vs Rhino Charge
02:30 PM Chanmari West FC vs Mizoram Police FC
# Team Pld W D L GF GA GD Pts
1 Chhinga Veng FC 2 2 0 0 10 3 7 6
2 Chanmari FC 2 2 0 0 5 0 5 6
3 Rhino Charge 1 0 0 1 0 1 -1 0
4 Chanmari West FC 1 0 0 1 1 5 -4 0
5 Mizoram Police 2 0 0 2 2 9 -7 0