Montreal lamah Roger Federer

Grand Slam nomawi 19 kawl khawm tawh Roger Federer chuan US Open inbuatsaih nan kar leh chhunga khelh tur Canadian Open khelh a tum thu a tichiang, inelna hi kuminah chuan Montreal-ah nghah a ni ang.

Kum 35 mi Federer hi mipa player zinga major title nei hnem ber a nihna sawhnghet turin Wimbledon champion a ni leh tawh a, All England Club-a a inlan hnuah inelna a la hmachhawn leh rih lo.

Kumina Grand Slam hnuhnung ber atan August 28 aṭangin US Open khelh tur a ni dawn a, Swiss tlangval hian hard court inelna lian inbuatsaih nan hian Montreal a thlang. Canadian Open hi Montreal leh Toronto ten an inthlen chhawk ṭhin a, kumin hi Montreal lama neih hun a ni.

Vawi hnih a champion tawhna hmuna a inlan tur thu sawiin Federer chuan, "Montreal-a ka inkhel leh thei tur hi ka lawm, hun rei tak chhung chu he hmunah hian ka inkhel thei lo tawh a, kuminah season duhawm hmang chung ngeia ka inlan thei tur hi ka phur hle a ni," tiin a sawi.

Season hmasa chawnu lam zawng inkhel thei lo Federer hi kuminah a par vul leh mek. January thla khan a vawi nga nan Australian Open nomawi a chawi a, grass court inelna ngaihhlut Wimbledon-ah chawmpion hnem ber record siam turin a vawi riat nan a champion bawk; heng bakah hian Indian Wells, Miami leh Halle Open nomawi a chawi tawh bawk a ni.

Tournament director Eugene Lapierre chuan, "Federer hian August 8 hian a pianchampha a lawm dawn a, chumi rualin kan tournament buatsaih a khel thei dawn. Kan tan chuan tun hnaiah thil lawmawm a indawtin a thleng chho dawn tihna a ni," tiin a sawi. Lapierre hian fans ngainat Federer a inlan thei tur chu mipui lam tan pawh vanneihna a tlin thu a sawi tel bawk.