Arsene leh Arsenal kawng a bumboh dawn ; Alexis Sanchez-a'n team training a zawm ta

Premier League ṭan a hnai a, transfer bazarah club an che na tlangpui. Sum hman dan

aṭanga thlir chuan Arsene Wenger a kaihhruai Arsenal hi champion tura rinkai ber an ni lo ang. Mahse, football hi kawng tam takah chuan sum hmanga teh theih ni mah se a nih vek lohna pawh a awm bawk - Gunners hian league nomawi chawi an tum a nih chuan an kawng a bumboh hle dawn tih chu thil chiang awmchhun a ni rih.

Champion lai Chelsea bak­ah Jose Mourinho kaihhruai Manchester United, Pep Guar­diola enkawl Manchester City ten champion tumin pawisa an hmang a, Jurgen Klopp-a naute Liverpool leh Tottenhman hi sawi hmaih theih an ni lo bawk. Player leh manager thlir mai chuan ṭha deuhin parukna nih theih a ni dawn.

Thawhlehni khan London Colney-ah tunlai player sawi hlawh ber pakhat Alexis Sanchez-a'n team training a zawm leh tawh a, Chile international hi Pathianni khan training zawm tura tih ni mah se a dam loh avangin a hun sawn tlai sak a ni a, tunah pawh a duh a nih chuan ni hnih chawlh a neih belh thei ang - an duat teh e!

Barcelona forward hlui hi "Real Fighter" tiin Wenger chuan a lo sawi tawh ṭhin, hliam tenau leh dam lohna na lutuk lo nei chung pawha minute 90 inkhelh duh chi a ni, tuna a awm dan hi chu a hun hmasa lam nen a inang lo hle. Season hmasa Gunners tana goal khung hnem ber hian Emirates Stadium-ah kum khat daih bak contract a nei tawh lo.

Kum 28 mi Sanchez bakah Mesult Ozil, Kieran Gibbs, Alex Oxlade-Chamberlain leh Jack Wilshere te hi season thar tawp ruala contract tawp tur an ni a, contract thar an ziak lo emaw an chhuak lo a nih chuan nipui transfer lehpekah chuan man nei loin an duhlam an hawi thei ang - Wenger-a'n club dangin an awh em em Sanchez leh Ozil te hi a chelh tlang ngam a nih ngat chuan 'Big Signing' a ni ang.

Player thar

Sum seng ngam lo tia sawi hlawh Wenger-a'n a ze hlui a kalsan zel, a player manto ber ni turin striker Alexandre La­cazette chu Lyon aṭangin pound maktaduai 25-in a lalut, kum 26 mi Alexandre Lacazette hian Ligue 1 lamah goal khung thei bik a nih zia a lantir tawh; a zawnin season li chhung goal 20 chuang a khung tawh a, season liam ta khan goal 37 a khung.

France international hi feet 5 leh inches 7-a sang a ni a, striker palian Olivier Giroud aia thlan zawk nia ngaih a ni. Lacazette hi ball thiam leh che rang tak chu a ni ngei a, tharum hman tamna Premier League-ah eng ang chiah nge a nih fiah a la ni lo. Robin van Persie chhuah hnua striker hriam tak la nei leh lo Gunners ṭantute chuan Lacazette hi an mamawh chhanna ni turah an ngai.

Inkhelah goal khung a pawi­mawh tluk zetin a venhim a pawimawh. Wenger-a'n season hmasa tawp lam khan rin loh tak maiin tlarhung laiah player pathum a dah a, a tih fuh hle niin a inngai aniang pre season an khelh tawh hoah pawh 3-5-2 formation a hmang zui zel, season tharah pawh a hmang chhunzawm ngeiin a rinawm bawk.

North London club hian Bundesliga club Schalke aṭangin tharum ngah Sead Kolasinac an lalut a, Bosnia international defender hi wing back atana hman chi a nih avangin Wen­ger-a formation hman tur tichiangtu pakhat a ni, mual lehlam sirah Barcelona academy chhuak Hector Bellerin a awm thei bawk ang.

Tlarhnung laia awm turin Laurent Koscielny, Shkodran Mustafi, Gabriel Paulista leh Rob Holding te an awm a, season khat a liam hnua academy lam enkawl tur Per Mertesacker pawh mamawh chang chuan luh­tir theih a la ni bawk ang. Premier League tawnhriat nei ṭha keeper Petr Cech leh Colombia international David Ospina te an awm bawk avangin an dam kim a nih phawt chuan an ngaih­tuahawm loh tura ngaih an ni.

Mamawh dang

Arsenal squad thlir ila ma­mawh an la nei tih chu a chiang a, an mamawh ber tia thlan chhuah fak tur erawh a vang viau. Football expert tam tak chuan tun hnaia nomawi lian tham an chawi theih loh chhan pakhat chu midfield lai awp lumtu an neih ṭhat tawk loh vang niin an sawi.

Patrick Vieira a awm lai kha chuan amah kha a nghet a, tlarhnung a pui ṭhain a hma lam tan a ṭangkai bawk. France internationl kha khelmual chhung­­ah hotu a ni a, a bik takin inkhel boruak sangah a pawi­mawhna a zual ṭhin.

Tun dinhmuna a lan dan chuan Granit Xhaka leh Aaron Ramsey te hi Gunners midfield awptu tur an ni. Hliam tuar mek Santi Cazorla rawn let hun tur a la hriat loh a - Jack Wilshere, Francis Coquelin leh Mohamed Elneny te hi 'player ṭha thawkhat' an ni.

Swiss international Xhaka hian card hmuh a hrat a, tun hnai kum thum chhungin vawi kua hnawhchhuah a ni! Player puitling ni tur chuan thinrim insum theih a mamawh. Welsh international Ramsey hian theihna a nei sang a, chutihrualin Vieira angin tharum a ngah loh bakah a paukhauh lo zawk bawk.

Arsenal hian season hmasa lama an harsatna langsar pakhat holding midfielder tur lei emaw, chher chhuah emaw chu an mamawh tih a chiang. AS Monaco midfielder Thomas Lemar lei tumin Ligue 1 club hi ṭum thum an dawr tawh a, an hnar vek. Wenger-a'n an la beidawn loh thu a sawi a, an lalut thei a nih chuan an harsatna pakhat a kiang thei tura ngaih a ni.

Kum 2003-04 season hnua Premier League nomawi la chawi leh lo Arsenal hian league-a hlawhtlinna chan an duh takzet a nih chuan khelh fuh nia chak vak ringawt loin, khelh chhiat ni pawha point thum hmuh dan an zir chhuah a ngai. Hei bakah hian an elpui club lian dang - Chelsea, Manchester United, Manchester City, Liverpool leh Tottenhman lakah tun hma aia point hloh tlem a ngai bawk ang.