Athletics ropuina vawn nun zel duhtu Usian Bolt ; Damdawi hman phal loh lakah kan fihlim tur a ni - Bolt

Infiammi zingah damdawi hman phal loh hmang lui hmuh chhuah thar an awm reng a, an medal dawn tawh pawh laklet sak an ni ṭhin. Boruak duhawm lo takin athletic khawvel a tuam mek lai hian Usian Bolt chuan dan zawm a pawimawh thu a sawi chhuak ta.

Kum 30-a upa Bolt hian Zirtawpni aṭanga neih tur World Championship zawh hnuah intlansiak a chawlhsan tur thu a sawi tawh a, London-a inelna lianah hian an ram Jamaica tan 100m leh 4x100m relay-ah a inlan dawn. Khawvela tlan chak ber hian a infiamna huanga a hun hnuhnung a hmang mek.

Jamaican sprinter ropui Bolt chuan, "Ka infiammi puite hian tunlai thil awmzia hi an hmuha an hriatthiam ngei ka beisei a, infiamna dik, ṭha leh felfai neih zel an duh a nih chuan an tih tur pawh an hre ngei ang. Tunah hian kan dinhmun a ṭha lo tih chu thil chiang a ni a, athletics a nun zel theih nan chuan damdawi hman phal loh laka kan fihlim a ngai a ni," tiin a sawi.

Infiamna huangah engtiklai pawhin damdawi hman phal loh hmang ru an awm ngei niin a lang a, nikuma Russia chhuina tihchhuah a nih hnuah phei chuan 'doping' hi a langsar zualin infiamna chanchin thar liantak pakhat a tling reng hial a ni.

Olympic gold medal pakua hlawh chhuak tawh Bolt chuan, "Tun hma deuh aṭang khan ka sawi uar ve tawh hle. Rim takin kan thawk a, hautak takin thi leh thau pawlhin inelna kan hmachhawn ṭhin. Harsa taka medal kan hlawhchhuah hi a hluin a ropui em em a, chutihrualin mi ṭhenkhat erawh dik lo taka chawimawina dawn tum an awm ve bawk. Infiamna chu a thianghlim tur a ni," tiin thianghlim taka inelna neih a duh thu a sawi.

Bolt hian Russia-in an ram sorkar hriatpuina ngeia an infiammiten dan an bawhchhia chu a hun tawn tawh zinga mak a tih ber pakhat a nih thu a sawi tel bawk. Russia infiammite hi an ram hminga inelna hmachhawn thei lo tura hrem mek an ni a, tun kar tir khan International Association of Athletics Fede­rations (IAAF) chuan hremna hi kaltlangpui zel rih tur a nih thu an sawi chiang leh tawh bawk.

Chak ber chu...

Feet 6 leh inches nga ngawta sang Bolt hian tun hnai Olympic hnuhnung pathum Beijing, London leh Rio-ah te khan 100m, 200m leh 4x100m inelnaah gold medal a la vek. Mahse, Beijing-a inelna neih ṭum hian 4x100m bika an team zingah damdawi hman phal loh hmang an awm tih hmuhchhuah a nih avangin gold medal pakhat hi lak let sak a ni.

Bolt hian a vanglaiin 100m (9.58 seconds) leh 200m (19.19 seconds) chhunga thlengin world record a siam tawh a, amah ngei pawhin he a record hi a la tluk leh thei lo a, tun thlengin khum thei an la awm lo bawk. Bolt hian kuminah 100m tlan thleng turin second 10 chuang a hmang ziah a, hei vang hian London-ah pakhatna a ni ngei ang em tih a chiang rih lo.

Zawhna chhangin Bolt chuan, "Kum 10 chuang zet chu infiamna khawvelah ka awm tawh a, ka record hi a la din zel pawh ka beiseiin ka duh bawk. Tun ṭuma inelna kan neih turah hian rinkai ber ka ni kher lo mai thei, mahse khawvela ṭha ber ka la ni a, hnehna chan tumin intlansiakna track chhuahsan ka tum ang," tiin a sawi.

Engtin zel?

Tun hma pawhin sprinter ropui tak tak an chhuak fo tawh a, an la chhuak zel bawk ang. Amaherawhchu Bolt ang ema sawi hlawh leh ropui hi an chhuak leh maiin a rinawm loh. Thuthar thehdarhtu a kawm ṭum pawhin a chawlh hnua a awm zel dan tur chu zawhna langsar a ni.

Bolt chuan, "Infiamna chi hrang hrang ka thiam a, tih chak tam tak ka nei bawk. Ka mamawh chu chawlh hahdam phawt a ni a, ka theih anga rei chu hahchawlh nan ka hmang phawt ang," a ti. Bolt hian a rilru lam chu intlansiak zel turin inepih mah se a taksa dinhmun a ngaihtuah tel a ṭul thu a sawi tel bawk.