FC Goa-ah Moroccan midfielder a lut

Indian Super League club FC Goa chuan Moroccan midfielder Ahmed Jahouh chu season thar atan an lalut. Kum 29-a upa defensive midfielder hian Moroccan club ṭha Moghreb Tetouan tan an ram league sang ber nomawi vawi engemaw zat a lo chawi tawh a, season hman zawh takah khan Fath union Sport de Rabat club tan a khel.

Morocco international hian Arab Nations Cup 2012-ah khan an ram chu a lo champion pui tawh a, best midfielder-ah thlan a ni hial. Indian Super League a lo pan takah chuan Moroccan player zinga India-a inlan hmasa ber dinhmun a luah dawn ta a ni.

FC Goa hian coach thar Sergio Lobera kaihhruaina hnuaiah ram pawn player zingah Spanish winger Manuel Arana, forward Ferran Corominas leh Portuguese defender Bruno Pinheiro-te an lalut tawh a, Ahmed nen hian foreign player pali an nei ta chiah tihna a ni. ISL club-ten an duh chuan ram pawn player pariat an lei thei a, Goan club hian an duh chuan foreign player pali an la lakbelh thei ang.