Group A team panga an intluktawk ; Tla thei dinhmunah AFC leh India Under 19
Great Sports I Day Football ṭan tirha team hmuh châkawm chu Aizawl FC leh AIFF Under 19 te an ni a, semifinal lut tura rinkai pawh an ni. Amaherawhchu I League champion leh I League Under 18 champion te hi vawiina an chak lo a nih chuan an tlak ngei a rinawm.
Vawiin chhun dar 12:15 hian Aizawl FC leh Ramhlun North te an inkhel dawn a, I League club tan group match hnuhnung ber a ni.
Tlai dar 2:30-ah India Under 19-in ni thum awl tawh Bethlehem Vengthlang FC an hmachhawn dawn.India rama rawlthar ṭha rual thlan khawm hian chak an la nei lo. Vawiin hian Group A team panga zingah I League champion Aizawl FC hnehtu Dinthar FC an awl ang.
Hmahruaitu tur zawnna
Aizawl FC-in match thum an khelh tawh aṭangin chak, draw leh chak loh an tawng vek tawh a, point li chiah an la hmu.
I League club khingpui tur Ramhlun North hian point li tho hmu mah se match hnih chauh an la khel thung.
Nikum I Day Football final-ah team pahnih hi an intawng a, chak tura rinkai zawk AFC-in harsa takin hnehna an chang. Vawiinah erawh chak tura rinkai zawk an awm tawh lo.
Ramhlun North an phûr
Ramhlun North coach Lalruatliana Sailo (Tawia) chuan, "Kan theihna anga kan khelh chhuah chuan min chelh chu ka ring lo a, amaherawhchu khelh ṭhat ṭum leh ṭum loh hi an inthlauh avangin a ṭawng huai theih loh. Aizawl FC tan leh kan tan inkhel pawimawh a ni a, kan hmalam hun hi kan kutah eng emaw chen a awm avangin kan inkhel tur hi a pawimawh a ni," a ti.
Tawia hian tun season-ah Nigerian pahnih Oneyeama Francis leh Olaniran Joseph Segun-te a chhawr thei a, Mizo player-ah pawh phai lama tawnhriat nei tawh Lalrinfela, Lalliansanga, Jessy Vanlalmuana leh V. Lalchhuanawma-te a kawl bawk avangin Aizawl FC laka phuba la thei tur khawpin an ṭha.
Coach thar hnuaiah AFC
Aizawl FC-in Alfred Kemah Jaryan leh Kareem Omolaj te an neih bakah East Bengal aṭangin David Lalrinmuana an la let a, I League laia an lakluh MPL5 best midfielder Lalruatfela Zote an chhawr thei tawh a, DSK Shivajians aṭangin MPL4 best midfielder Lalṭhathanga an nei thar bawk.
Player an nei ṭha a, amaherawhchu an la inhre chiang tawk lo a, match thum an khelh tawh aṭangin champion zia an la chhuah lo.
I League club tan phur tharna tur chu Paul Jorge Coelho Menezes-a'n a ho tawh dawn a, Portuguese coach hian Dinthar FC an hneh loh ṭumin hun tawp lam a thlir hman. Nimin lamah AFC team hian a vawi khat nan coach Paul Jorge hoin training an nei a, pressure sang tak hnuaiah bul a ṭan ang.
Coach lailawk Rohming-thanga chuan, "Coach ṭha tak a nih a rinawm a, amaherawhchu match a awm lehnghal avangin a duh angin training a la nei thei bik lo. Player a la hriat chian loh avangin puih a la ngai dawn a, player-te pawhin an dahsan avangin a thusawiin nghawng thui tak a nei ang," tiin coach tharin result ṭha a rawn thlen a beisei thu a sawi.
BVT tan hun ṭha
Bethlehem Vengthlang FC-in an match hmasa bera Aizawl FC an hneh loh hnuah Dinthar FC an hneh a, vawiina an match hma hian hahdamna hun ṭha an neih bakah an khingpui tur AIFF Under 19 khelh dan zirchianna hun ṭha an nei bawk.
BVT-in match hnih an khelh tawh aṭangin goal hnih an khung a, B. Zoramthara khung ve ve a ni. MFA Super Cup leh I Day Football aṭanga thlirin coach Chawngthansanga enkawl BVT hian semifinal lut turin theihna an nei tih a lang a, amaherawhchu goal khungah erawh hma an sawn a ngai. Thara thlawp turin player dang an penchhuah a ṭul ang.
India Under 19
AIFF Under 19 coach Floyd Pinto-a'n hahchawlhna hun an ngah lo tih hriain an match hnuhnung berah player a siksawi nual a, match thumnaah erawh tla thei dinhmuna an din avangin an ṭhat dan bera an luh ngei a rinawm a, pressure sang tak hnuaiah rawlthar ṭha rualin fiahna an hmachhawn dawn tihna a ni.
India Under 19 hian Aizawl FC leh Ramhlun North lakah point khat ve ve an hlawh chhuak a, vawiina BVT an hneh loh chuan an tla dawn.
India Under 19 hian nikumah knockout stage an thleng pha lo a, kuminah semifinal thlen ngei tumin an rawn thawk chhuak a, group stage-a an tla nawn a nih chuan mualphona a ni ang.
Group A - Team Dinhmun
July 28, Zirtawpni - Rajiv Gandhi Stadium
Aizawl FC 2 - 1 Bethlehem VT FC
AFC : Lalrinzuala Khiangte 18'; Kareem Omolaja 58'
BVT : B. Zoramthara 28' (P)
Dinthar FC 1 - 4 Ramhlun North FC
DFC : Samuel Laltlanthanga 78'(P)
RNFC : C. Ramdinmawia 41' ; Lalliansanga 45'; Oneyeama Francis 84', 90+1'
July 31, Thawhṭanni - Lammual
Bethlehem VT FC 1 - 0 Dinthar FC
BVT : B. Zoramthara 67'
AIFF Under 19 0 - 0 Aizawl FC
August 2, Nilaini - Lammual
AIFF Under 19 1 - 1 Ramhlun North FC
AIFF : Lalawmpuia 78'
RNFC : Lalliansanga 1'
Dinthar FC 2 - 1 Aizawl FC
DFC : Lalbiakhlua 27'; Lalnunsanga (Talea) 90+2'
AFC : Kareem Omolaja 16'
Vawiin Inkhel Tur - Lammual
12:15 PM Aizawl FC vs Ramhlun North FC
02:30 PM Bethlehem VT FC vs AIFF Under 19
August 7, ThawhṬanni - Lammual
12:15 PM Dinthar FC vs AIFF Under 19
02:30 PM Ramhlun North FC vs Bethlehem VT FC
# Team Pld W D L GF GA GD Pts
1 Ramhlun North 2 1 1 0 5 2 3 4
2 Aizawl FC 3 1 1 1 3 3 0 4
3 Bethlehem VT 2 1 0 1 2 2 0 3
4 Dinthar FC 3 1 0 2 3 6 -3 3
5 AIFF Under 19 2 0 2 0 1 1 0 2