La Liga-in Neymar lei an phal lo!

Barcelona meuhin chhuah phal tawh mah se La Liga lam thuneituten Neymar chhuah an phal tlat lo - nimin khan Brazil captain hi a ukil-te nen La Liga office-ah Paris St-Germain in lei an tumna zat pawisa nen an leng lut a, mahse Spanish league sang ber hotute hian PSG lamin Financial Fair Play dan an bawhchhiat an rin avangin an pawm lo.

Nimin khan Neymar transfer hi fel hman tura ngaih a ni a, La Liga lamin an pawm tak lohah chuan he thu buatsaih lai thleng chuan Neymar hi Barcelona player a la ni rih - mahse trans­fer-ah chuan thil thleng 'thut' thei reng a ni a, he thuziak i chhiar meuh chuan Neymar hi PSG jersey nen phochhuah a ni tawh mai thei bawk.

Thil awmzia

Neymar-a contract-ah amah duhtuin an lei theihna zat intarlang chu pound maktaduai 198 a ni a, hei hi PSG-in pek an huam. French club-in sum ngai zat pek an inhuam miau avangin Barca tan dan theih an ni lo a, Neymar hi chhuah phalna an pe.

La Liga danah chuan club-in player an lei dawn reng rengin an lei tum player hnenah amah lei an tumna zat chu an pe phawt tur a ni. Player chuan chu sum chu La Liga hotute hnenah a pe ang a, Spanish league sang ber thuneitute hian player hralhtu club hnenah sum hi an pe chhawng leh dawn a ni.

Mahse, La Liga berin Ney­mar lei tumna an pawm lo - hei hi French club-in Financial Fair Play dan an bawhchhiaa an ngaih vang a ni a, La Liga president Javier Tebas hian hemi chungchangah hian PSG hi a lo vau tawh.

Tichuan...

Barcelona thiampuipa Lio­nel Messi meuhin, "Ka ṭhian, nangnena kha leh chen hun kan hmang dun thei kha ka lawm takzet a, i hmaa chona thar inchhawp turah duhsakna ka hlan che a ni," tiin scoial media lamah a ṭhianpa thlahna thu a ziak tawh a, La Liga lamin khawvel player manto ber ni tura Neymar-a man zat pawm lo mah se PSG-ah Brazil captain hi a kal ngei a rinawm tho.

'Neymar-a'n Messi hliah­khuhna hnuaia awm reng a duh tawh lo' tihte, 'Ballon d'Or chawimawina dawng tur chuan a chhuah hi ṭha berah a ngai a ni' tihte chu Brazilian forward-in Paris khawpui lam a hawi chhan niah tarlan ni mah se a phena a chhan lian ber pakhat chu 'sum' tih hi hai rual a ni lo.

PSG hian chhiah pek hmain Brazil captain hi kar khatah £775,477 (Rs. 6,50,06,457) hlawh­tir an inhuam a, chu chu kum khatah pound maktaduai 40.3 tihna a ni - tuin nge Champions League khel tur club lak aṭanga sawmna heti zat hnar phal ang?

Tam tak!

PSG hian Neymar hi an lalut a nih chuan a manah pound maktaduai 198 an inseng dawn chiang a, beisei dan chuan kum nga chhung contract a ziak ang. A hlawh turte nena chhut vekin PSG hi Neymar tan kum nga chhungin pound maktaduai 400 an inseng dawn tihna a ni.

Neymar-a'n Barcelona-ah kum khatah pound maktaduai 11.3 a hlawh mek a, khelmual pawn lama fakna lama a inhman­naah pound maktaduai 16.6 lalut bawkin footballer zinga khelmual pawn lam aṭanga sum lalut hnem ber dinhmun a luah mek.

PSG-ah kar khatah £775,477 a hlawh dawn avangin Shanghai Shenhua-a £615,000 (Rs. 5,15,54,039) hlawhtu Carlos Tevez a khum dawn tihna a ni a, kar khata £500,000 (Rs. 4,19,13,853) hlawhtu Messi leh £365,000 (Rs. 3,05,97,112) hlawhtu Cristiano Ronaldo a khum ang.