United tan Matic inlan nghal

Manchester United-in Thawhlehni zan khan Sampdoria 2-1 in an hneh a, player thar Nemanja Matic chu inkhel bul ṭantir nghal a ni.

United hian August 8, Thawhlehni zan dar 12:15-ah Real Madrid nen UEFA Super Cup-ah an inhmachhawn dawn. Skopje, Republic of Ma­ce­donia-a inkhel turah hian Jose Mourinho-a'n Chelsea a enkawl lai aṭanga tawha a player pawi­­­mawh Matic hi chhawr a tum ngei niin a lang.

Aviva Stadium, Dub­lin-a inkhelah hian United tana Henrikh Mkhitaryan tauh luh chu first half-ah vek Sampdoria-in Dennis Praet hmangin an sut a, minute 81-naah Juan Mata-a'n chakna goal a khung. United-in season thar atana inpuahchah nan match sarih an khel a, vawi ruk hnehna changin Barcelona chauh an hneh lo.

United manager Jose Mourinho chuan, "Season thar atan Matic hian amah chauhin a inpuahchah a, professional takin a theihna zawng zawng a chhuah a nih pawhin football chu team game a nih miau avangin a nih tur ang a la ni lo. A thluak hmangin ṭha takin a khel thei a, amaherawhchu a ṭhat dan ber ka hmu dawn a nih chuan tun aia a fitness a ṭhat a la ngai. A tawnhriat, finna leh thiamna vangin chhawr theih turin a inpeih thuai dawn a, engkim hi awlsam takin a khel a, a position-ah hian a ṭha hle a ni," tiin a player thar a fak.

Matic hian United a zawm hmain Chelsea team zingah training neiin a zin ve lo a, amah chauhin London-ah training a nei thung. United hian Serbian midfielder Matic an lak hma hian Victor Lindelof leh Romelu Lukaku te an lalut tawh bawk.

Portuguese manager Mourinho chuan, "Trans­fer laia sum chevel a tam avangin player lakluh a har em em a, hetichunga ka player duh pali zinga pathum ka neih theih avangin club chungah ka lawm hle a ni. Tuna kan squad-ah hian ka lawm a, pakhat dang kan lakbelh leh chuan kan hlim lehzual ang," tiin tranfer an hman ṭhat thu a sawi.