Sanga kaihhruai Chhinga Veng an ropui ; Goal nga khung Chanmari West-in beisei an nei
Chhinga Veng FC-in nomawi duhin Lalsangzuala Hmar an lalut a, Santosh Trophy hnuhnung bera Mizoram coach Sanga hnuaiah Chhingcows hian MFA Super Cup an champion tawh bakah MPL club pathum Chanmari West FC, Mizoram Police leh Chanmari FC te lakah goal nga vek an khung!
Nimin Great Sports I Day Football inkhelhah Chhinga Veng hian Chanmari FC chu 5-1 in an sawp a, semifinal lut hmasa ber an ni. Inkhel hmasa zawkah Chanmari West FC-in state pawn aṭanga chah luh Rhino Charge 5-2 in an hneh ve bawk a, HC Zarzoliana hoten match hmasa bera an mualpho hnuah semifinal an sawi ri leh ngam tawh ang.
West Warrior an tho
Chanmari West FC nena inhmeh tawh tak forward H. Lallianzama'n tun season-a a vawi khat nan inkhel bul a ṭan a, Zobawk tlangval hian vanneihna a keng tel a, goal hmaa vannei chu Calvin Zosiamliana a ni.
Kolasib tlangval Calvin-a hian minute sarih chhung goal hnih a khung nghal der tawh a, Assam-a inbengbel army team Rhino Charge a hawihai a, Chanmari West an khelh ṭhat bawk avangin point thum an hlawh chhuak dawn tih a chiang titih nghal.
Lianzama'n minute 38-naah West Warrior goal thumna a khung a, first half-ah 3-0 a ni. Rhino Charge tan beidawnna tham ni tawh mah se army team hian huaisen takin second half-ah an bei let.
Minute 52-naah Kolasib tlangval L Zama'n goal khat khungin Rhino Charge tan beiseina thar a siam a, amaherawhchu Chanmari West an inthlah dul loh avangin comeback hmuh tur a awm lo. West Warrior-in Vanlalthlamuana hmangin minute sarih hnuah goal lina an khung leh nghal a, Lalromawia'n minute 70-naah goal ngana a khung leh bawk.
Kolasib tlangval chet ṭhat niah Rhino Charge midfielder Jessy Sailo pawhin scoresheet-ah a hming a nem kai a, Kolasib tlangval Jessy hian minute 87-naah mualpho lutuk tur hliah khuhna goal a khung. Minute 90 chhungin goal sarih a lut a, Chanmari West FC 5-2 in an chak.
Dan rual loh Chhingcows
Chhinga Vengin tihpalh vanga MFA Super Cup champion an ni lo tih Chanmari lakah an pholang a, Chhingcows hian Mizoram Premier League champion lai Chanmari chu 5-1 zetin an sawp.
Lalsangzuala Hmar tan nimina hnehna an chan hi hriatreng tlak a ni dawn a, a chhan chu Chhingcows coach Sanga hian a idol leh amah chhertu H. Vanlalthlanga hnuaia khel team a hmachhawn hmasak berah hnehna a chan vang a ni.
Chanmari FC-in nimin inkhelah bul an ṭan chhe lo a, nung takin ball inpe kual mah se Chhingcows-in an chance neih hmasak berah goal an khung nghal. MFA Super Cup top scorer Malsawmfela'n minute 11-naah a club hlui lamah a tauh goal a, Chhinga Vengin inrintawkna an nei nghal bawk.
Chhinga Vengin inkhel an thunun zui a, MS Dawngliana'n hun chanve hma lam leh hnu lamah goal khat ve ve a khung bakah MPL5 top scorer Laldampuia'n second half-ah goal hnih a khung belh.
Chhingcows hian season liam taa an u en Chanmari lamah goal nga an khung a, MPL5 champion hian Rochhingpuia penalty hmangin goal khat khung mah se an goal chhuah zat vang hian an inlêt ngei ang.
Transfer nghawng
Chhinga Veng tana inkhel bul ṭantu Sawmfela, defender Lalrinchhana, midfielder Lalrinchhana leh left back Ramfangzauva te hi season liam taa Chanmari FC-in MPL an champion theihna chhan an ni a, Chhingcows-in an chhuhsak.
Hei chauh hi a ni la lo a, goal hnih khungtu Dawngtea leh midfielder pawimawh R. Malsawmtluanga te hi MPL2-a Chanmari FC champion puitute an ni. MPL3 season tawp lamah striker ṭha Dawngtea leh midfielder ṭha MS-a te an chhuak a, Chanmari FC-in nomawi an hloh phah. A tawi zawng chuan Chanmari player hluiten Chhinga Veng kawr hain Chanmari FC an sawp tihin a sawi theih bawk.
Hmunruak pakhat
Chhinga Vengin semifinal an lut tawh a, team dang pali Chanmari FC, Chanmari West FC, Rhino Charge leh Mizoram Police ten hmunruak pakhat an inchuh dawn.
Tun Inrinni hian Chanmari Derby khelh a ni dawn a, Chanmari West-in Chanmari an hneh a nih chuan MPL5 champion hi an tla dawn. He inkhel result a zir hian Police leh Rhino Charge te pawhin beisei tur an la nei bawk ang.
Group B - Team Dinhmun
July 29, Inrinni - Rajiv Gandhi Stadium
Chanmari FC 4 - 0 Mizoram Police FC
CFC : PC Zosangliana 4', 49'; Jacob Vanlalhlimpuia 20'; C Lalrosanga 53'
Chhinga Veng FC 5 - 1 Chanmari West FC
CVFC : Malsawmfela 9'; MS Dawngliana 45'; Lalmawizuala 47' (OG); Laldampuia 69', 83'
CWFC : Lalnunmawia 30'
August 1, Thawhlehni - Lammual
Mizoram Police 2 - 5 Chhinga Veng
MPFC : Lalfakawma 3'; B. Zoramthanga 10'
CVFC : Malsawmfela 21', 76'; R. Laldinliana 62'; MS Dawngliana 62'; Lalkhawpuimawia 79'
Rhino Charge 0 - 1 Chanmari FC
CFC : Vanlalbiaa Chhangte 43'
Nimin Inkhel Results - Lammual
Chanmari West 5 - 2 Rhino Charge
CWFC : Calvin Zosiamliana 4', 7'; H. Lallianzama 38'; Vanlalthlamuana 59'; Lalromawia 70'
RHI : L Zama 52'; Jessy Sailo 87'
Chanmari FC 1 - 5 Chhinga Veng
CFC : Rochhingpuia 75' (P)
CVFC : Malsawmfela 11'; MS Dawngliana 21', 46'; Laldampuia 61', 86'
August 5, Inrinni - Lammual
12:15 PM Chanmari FC vs Chanmari West FC
02:30 PM Mizoram Police FC vs Rhino Charge
August 8, Thawhlehni - Lammual
12:15 PM Chhinga Veng FC vs Rhino Charge
02:30 PM Chanmari West FC vs Mizoram Police FC
# Team Pld W D L GF GA GD Pts
1 Chhinga Veng FC 3 3 0 0 15 4 11 9
2 Chanmari FC 3 2 0 1 6 5 1 6
3 Chanmari West FC 2 1 0 1 6 7 -1 3
4 Rhino Charge 3 0 0 3 1 5 -4 0
5 Mizoram Police 2 0 0 2 2 9 -7 0