Sharapova chak niah Muguruza chak nuamsa

Grand Slam vawi 15 champion tawh Maria Sharapova-i'n beiseina sang tak nen season khar a tum a, mahse hliam vangin a buai leh ta. Russian nula hi Nilaini zan khan West Classic second round khel tur a ni a, a ban na vangin a inlan thei lo. Hetih lai hian Garbine Muguruza erawh harsatna nei loin a chak thung.

Kum 30 mi Sharapova hian a match hmasa zawk­ah Jennifer Brady chu 6-1, 4-6, 6-0 in a hneh tawh. California-a neih inelnaah hian Ukraine nula Lesia Tsurenko nen a inkhel leh tur an ni a, hliam vangin hreh tak chungin a inhnuhdawh a ngai ta a ni.

Hmeichhe infiammi zinga sum lalut hnem ber ni reng tawh ṭhin Sharapova chuan, "Match hmasa ber ka khelh zawh khan ka ban vei lam hi a na tawh a, doctor ka hmuh hnuah inkhel lui lo turin thurawn min pe a, ka zawm a ṭul ta a ni," tiin a sawi.

Russian nula Shara­pova hi a tawn san lai chuan world number hial pawh a ni ṭhin. Amah­erawh­chu, damdawi hman phal loh a hmang tih hmuh chhuah a nih avangin thla 15 hrem a ni a, hremna a hman zawh hnuah clay court season tawp lam kha a khel hman.

Mahse, clay-ah hian match riat bak a khel hman lo, hliam vangin a chawlh a ngai a, grass-ah pawh a inlan thei lo tlang. Kumina Grand Slam khelh hmabak awmchhun US Open main draw khel turin world number 171 Sharapova hi a ranking a sang tawk lo a, wildcard a hmu a nih loh chuan qualifying aṭanga bul a ṭan a ngai dawn a ni.

Second round in­khelah Wimbledon cham­pion hlim Muguruza chuan kum 17 mi chauh Kayla Day chu 6-2, 6-0 in a sawp. Kum 23 mi Muguruza hian American tleirawl lakah zahngaihna a lantir lo hle a, set hnih an khelh chhungin game hnih chiah a hloh.

Spain nula Muguruza chuan, "Wimbledon cham­­pion ka nih khan in­khel dangah awlsamna min siamsak ngei ka beisei a, mahse rin ang ngawt a ni lo hle. Thil thleng tawh ho kha chu dahṭhat a hun tawh a, tunah chuan grass court ni loin hard court lamah rilru zawng zawng ka pek a ṭul tawh a ni," tiin a sawi.