Boxer ropui Wladimir Klitschko a chawl ta

"Ka duhthusam zawng zawng hlawhtlinna ka hmu tawh a, tunah chuan infiamna huang chhuahsana nun bul ka ṭan a hun ve ta a ni," tiin boxing legend Wladimir Klitschko chuan inhnek a chawlhsan thu a puang a, a glove bunin ring chhung a rap leh tawh dawn lo.

Kum 41 mi boxer hi April khan British boxer ṭhangduang Anthony Joshua hmaah a tlawm a, November 11-ah boxer pahnih hi intawng leh tura ngaih ni mah se Ukrainian boxer hian a chawlh thu a puan tak avangin mipui hmuh chak heavyweight fight hmuhnawm chu phochhuahin a awm dawn ta lo - Klitschko glove ruak thawlh zo khawpa ropui tu nge awm ang?

Mangṭha boxing

Kum 41-a nih thlengin Klits­chko-a'n boxing glove a bun a, tunah chuan a kum zat ngaih­tuahin ring chhung rap chhunzawm zel chiah a inngai tawh lo. Boxer ropui zinga chhiar tel ni kumkhua tawh tur Klitschko chuan, "He­tiang taka rei hi boxing khaw­velah hlawhtling takin hun ka hman theih ka inbeisei ngai lo," a ti a, a duhthusama boxing khawvel a mangṭha thu a sawi.

Ukrainian boxer chuan, "Kum 27 liam taah infiamna khawvela ka zinkawng chu ka zawh ṭan a, thutlukna ka siam a zawnga a fuh ber pawl a ni ngei ang. He ka duhthlanna avang hian khawvel hmun hrang hrangah ka zin kual a, ṭawng thar ka zir a, sumdawnna bul ka ṭan a, thil duhawm tak tak ka tawng a,

ṭanpui ngaite ka ṭanpui bawk,"

"Hun rei tak chhung chu boxing khawvel ka mangṭha hnua ka hnathawh tur hi ka lo duang lawk tawh a, hlawhtlinna duhawm tak ka chhar chhunzawm zel ka beisei a ni," tiin infiamna pawn lamah chona thar a hmachhawn tur thu a sawi.

Zinkawng ngaihnawm

Klitschko-a'n kum 1996 Olympic Games-ah khan super-heavyweight gold a la a, khawvel hriat a hlawh ṭan. Ukrainian boxer hian amateur boxing-ah mai duhtawk loin kum 1997-ah professional boxing a luhchilh ṭan a, kum 1998-a American boxer Ross Puritty a ngam loh hma zawngin match 24-ah hnehna a chang fai vek.

Kum 2000-ah American boxer Chris Byrd hnehin WBO title a la a, mah se kum 2003-ah South African boxer Corrie Sanders leh kum 2004-ah American boxer Lamon Brewster ngam loin a mualpho. Klitschko-a tlu reng lo, kum 2004-a a tlawm hnuah kum 11 chhung ngam loh tawng loin a kaltluang a, November 2015-a Tyson Fury laka a tlawm kha kum 11 hnua ngam loh a tawn hmasak ber a ni.

Klitschko hian boxing khaw­velah hun a hman chhungin vawi 69 ngawt inhnek a hmachhawn hman a, heng zingah hian vawi nga chiah tlawmin vawi 64 hnehna a chan zingah vawi 53 ngawt chu a khingpui a knockout a ni.

Hun hnuhnung

Klitschko-a'n kum 2015-a Fury a ngam loh hnuah ngai a awh leh tawh lo. Kum 40 chuang tawh boxer hian WBA, IBF leh WBO title-te chu British boxer lakah hian a chan a, an inhnek hmaa contract-a ziah angin a vawi hnih nan Fury hi inhnek nawn puiah a cho. Mahse, British boxer hian rilru lam buaina a neih chhunzawm a, inhnek thei dinhmunah a ding tawh lo.

British boxer dang a lo lang a, a hming chu Anthony Joshua a ni. Klitschko a hmachhawn hmaa vawi 18 inhnek a hmachhawna a khingpuite knockout vektu boxer hian a hnehna chan zat chu Ukrainian boxer a hmachhawn hnuah 19-ah a puntir a, round 11-naah a ngaihsan ṭhin boxer hi a tukdawl.

A upa tawh

April thlaa Wembley Sta­dium-a Klitschko leh Joshua an inhmachhawn dawn khan mi tam tak hmuh châk a nih rualin Ukrainian boxer hi a upat tawh avangin boxer ṭhangduang Joshua hi a chak ringtu an tam a, beisei ang ngeiin an khawtualah ngei hnehna a chang bawk.

Joshua-a'n Klitschko hi knock­­­out mah se a thiamna erawh a la ngai reng tih hmuh tur­­in a awm a, a huaisennaah rin­hlelh tur a awm lo. Mahse, chiang taka lang chhuak erawh Ukrainian boxer hi a 'a kum a tam ve ta deuh' tih hi a ni a, round 11-naa knockout a nih pawh kha a thiam lohna ai chuan a kum upat tawh vanga a chet ran tawk tawh lohna leh thahrui nghah tawk tawh lohna niin a lang.

A chawlh chhan

Las Vegas khawpuiah No­vember 11 khian Wladimir Klitsch­ko leh Joshua te inhnek nawn tura beisei an ni a, mah se beisei angin Klitschko hian contract a ziak lawk lo a, tunah chuan a chawlh thu a puang ta. Joshua chuan, "Klitschko hi a kum upat tawh vanga chawl turah ka ngai lo. Floyd Mayweather hi en ula, a la hrisel ṭha em em, Klitschko pawh hi chutiang tho chu a ni," a ti.

British boxer chuan, "Klits­chko sulhnu hi a ropui em em. Hnehna a chan loh ṭum pawhin mite fak rawn leh zah taka an en a ni reng tho a, chutiang boxer ni tur chuan hna ropui tak thawh a ngai a ni. A kum upat lam ai mah chuan a rilru hi inhnek zel turin a inpeih tawh lo ni berin ka hmu a, a unaupa (Vitali Klitschko) hian chawl turin a duh em em bawk," tiin a sawi.

Wladimir Klitschko ber a chawlh takah chuan Anthony Joshua hmachhawn leh tur a la chiang lo a, tun dinhmunah chuan vawi 26 inhnek a hmachhawna vawi khat tlawm tawh Kubrat Pulev chu a hmaa ding tura beisei a ni - Pulev-a'n a hneh loh awmchhun hi Klitschko a ni.