Jagielka-a'n rinawmna thu a tiam

Everton captain Phil Jagielka chuan Mer­seyside club-a a contract neihlai chu kum khat dang atan a pawtsei a, kum 2019 thleng Merseyside club tan hian a khel dawn tihna a ni.

Kum 34 mi defender hian season hman zawh takah khan league match 27 a khel a, Premier League-ah Toffees (Ever­ton sawina) hi pasarihna a nihpui. Kum 2007 khan Sheffield United aṭangin Everton hi a pan a, match 349 inlan sak tawhin goal 18 a khung ve tawh bawk.

Jagielka chuan, "He club hian hmasawn zawngin ke kan pen zel a, tun transfer-ah pawh kan player duh ang kan la la kim lo chungin kan duh tak player-te a hma lama kan lalut thei hi a lawmawm a ni," tiin Everton-a contract thar a ziah chhan chu players ṭha tak tak an lakluh vang a nih thu a sawi a, Liver­pool khaw club-ah hlawh­tlinna chhar theih a inbeisei.

Everton hian nipui transfer-ah player paruk ngawt an lalut tawh a, goal­keeper Jordan Pickford, attacking midfielder Davy Klaassen, England defender Michael Keane, Southampton defender Cuco Martina, Spanish forward Sandro Ramirez leh England international Wayne Rooney-te nena khel ho turin Jagielka pawhin thutlukna a siam leh ta a ni.