Napoli hneh lo Bayern an buai

Bayern Munich-in pre season an hmang ṭha lo hle a, Nilaini zan khan Napoli lakah 2-0 in an tlawm. Season thar inbuatsaihna match hnuhnung atan Pathianni zanah Dortmund nen DFL-Supercup an khel dawn a, midfielder James Rodriguez leh Thiago te chu hliam vangin an inlan thei dawn lo.

Mikhual tana inkhelh harsatna hmun tia an sawi ṭhin Allianz Arena-ah Kalidou Koulibaly leh Emanuel Giaccherini ten goal an khung a, Carlo Ancelotti nauten a chhanletna an neih loh avangin anmahni fans ngeiin an au el hial.

Season hmasa Bundesliga nomawi chawitu Bayern hi pre season match-ah beisei ang result an nei hlei thei lo. Napoli an hneh loh hma hian Premier Leeague club pahnih Arsenal leh Liverpool te an hneh lo tawh bawk.

Audi Cup-ah Reds 3-0 a an ngam loh ṭum hian Real Madrid aṭanga loan hmanga an hawh Rodriguez leh Thiago te chu hliam vanga lakchhuah an ni a, James hi a rei lo berah chawlhkar khat tal a chawlh a ngai dawn.

Bayern chuan thuchhuah siamin, "James Rodriguez hian Liverpool a hmachhawn ṭum khan a malpui dinglam tihrawlah hliam a tuar a, chawlhkar khat tal a chawlh a ngai dawn. Colombia internatuional hi Bundesliga season ṭan a nih hunah erawh dam hman tura beisei a ni," an ti. Bayern hian an league match hmasa ber atan August 18 hian Bayer Leverkusen an hmachhawn ang.

Season thara Champions League khel tur Liverpool an ngam loh ṭum hian David Alaba pawhin hliam tenau a tuar a, Austria international erawh a hliam a nat loh avangin Ningani khan team training a zawm leh nghal thei thung.

Reds laka minute 21 bak inlan hman lo Thiago pawh a hliam a la dam lo a, ani pawh hian Dortmund a hmachhawn thei dawn lo tih chu a chiang tawh. Coach Ancelotti tana thu lawmawm awmchhun nia lang chu centre back Jerome Boateng leh winger Arjen Robben ten team training an zawm ve leh tawh hi a ni ang.

Kum 33 mi Robben hian tennis a khelhna lamah a ke a ti na a, a hliam vang hian China leh Singapore lamah pawh a zin chhuak ve thei lo, tunah erawh Dutch international hi a dam tawh. Germany international defender Boateng pawh hliam vang thoin Asia tour-ah hian a tel thei lo - senior player pahnih an dam ta hi Ancelotti tan thawk huaina tham a tlingin a rinawm hle a ni.