AC Milan coach a hmanhmawh lo

Club ropui nih leh tuma hma la mek AC Milan coach Vincenzo Montella chuan striker lei belh turin an hmanhmawh tawh rih loh thu a sawi chhuak.

Milan hian tun nipui transfer chhungin player 10 zet an lalut tawh a, heng zingah hian striker Andre Silva leh Juventus aṭanga an lakluh Leonardo Bonucci te chu player langsar an ni. An goalkeeper ṭhangduang tak Gianluigi Donnarumma chu contract thar an ziahpui tawh bawk.

Player lei hnem tawh mah se Mon­tella hian an la duhtawk loh thu a sawi tawh a, tunah hian Borussia Dort­mund hmatawng Pierre-Emerick Aubameyang, season hmasa Premier League-a Chelsea champion puitu Diego Costa leh Torino forward Andrea Belotti te nen sawi zawm mek an ni.

Italian manager Montella chuan, "Transfer bazarah hna kan thawkrimin kan chau hle, rei lote kan chawl det ang a, kan chawl hlen dawn tihna erawh a ni lo. Kan lakthar Silva hi striker rintlak a ni a, a khelh tawh chinah pawh a ti ṭha hle. Squad chak tak din tur chuan position tinah player ṭha ngah a ngai, chumi tur chuan hma lak mek a ni a, chutihrualin kan hmanhmawh tawh lem lo," tiin a sawi.

Season hmasa Serie A parukna Milan hian season thara Europa League group stage khel phak tur chuan playoff an paltlang a ngai dawn, nizan khan Romanian club FC Universitatea Cluj nen an inkhel a, he thu buatsaih lai hian result kan hre hman lo.