'The Special One' Ropuina rama Chelsea hlangkaitu Jose

Chelsea ropui vanglai sawi dawn chuan Jose Mourinho hming lam tel loh a harsa a, English club 'vantlang' ve tak khai chhuak tura Portuguese manager hnathawh ropui hi football khawvel tan ngaihsan loh chi a ni lo.

 

Champions League 2003-04 season-ah khan Mourinho hian mak tak maiin European football-a club naran tak anga lang Porto chu a champion pui a, round of 16-a Manchester United an hnawhchhuah kha English football-in Mourinho a hmelhriatna a ni. 

European football-a club inelna sang berah hian first leg-ah Porto-in 2-1 in United an hneh a, Old Trafford-ah second leg khelin minute 90 thlengin Red Devils hian 1-0 in hma an hruai - hetiang hian inkhel tawp se away goal rule hmangin United chu tlang tur an ni. 

Mahse, minute 90-naah free kick aṭanga ball kal chu Costinha chuan Porto tan goal-ah a chantir - Old Trafford a reh duk a, Mourinho erawh a player-te goal khung lawmin mual sirah a tlan kual chiam! English football ngainatuten Mourinho an hmelhriat ta. 

July 2003 khan Russian sumdawng hausa tawntaw Roman Abramovich chuan Chelsea a lei a, hetihlaia coach Claudio Ranieri a ring zui. Italian coach hi a duh ang taka bazar-na tur sum tam tak pek a ni a, Premier League-ah Blues hi pahnihna nihpuiin Champions League-ah semifinal an lut bawk. 

Mahse, sum tam tak sengtu Abramovich-a'n a duh khawp lo. Old Trafford-a Sir Alex Ferguson ngawih tirtu, khawvel barakhaiha Champions League nomawi chawitu Mourinho kha a hre reng a, Portuguese manager hi English football-ah a lalut.

Mourinho-a'n khelmual a rah hma hauh aṭangin thawm a nei nghal hat a, press-a hmachhawn hmasak berah hming lem 'The Special One' a inpe nghal a, English football-ah a zam lo tih a pholang. 

Portuguese manager hna hmasa tur chu a chiang - Premier League nomawi chawi a ni a, he hna a tih hlawhtlin theihna turin Abramovich-a'n phal takin a sum bawm a hawng bawk. 

Mourinho-a'n Chelsea a enkawl hma kum 10 chhung chu Blues hi Premier League top six-ah regular takin an awm a, mahse an duh ber erawh nomawi a ni. 

Abramovich-a'n Chelsea a lei tirha sum a hmachhuan nghal avangin Ranieri-a'n Joe Cole, Damien Duff leh Claude Makelele-te a lo lei tawh a, Blues mamawh erawh coach danglam bik leh 'special' a ni. 

Mourinho-a'n Chelsea a zawm hma season-ah Arsenal-in tlawm nei lo chungin league nomawi an lo chawi tawh a, he team ṭha bik ropuina pheh thlak hi Mourinho-a 'hna' tur a ni a, a awlsam lo. 

Portuguese coach hian Chelsea team ṭha sa thuam belhchhah turin Petr Cech, Didier Drogba, Ricardo Carvalho leh Arjen Robben-te a lalut a, champion team din ngei a tum. 

Arsenal vanglai takin Mourinho a lo lang a, a season khatnaah Chelsea tan nomawi a chawi nghal - match 38 an khelhah vawi 29 an chak a, vawi khat chiah tlawmin goal 15 chiah an chhuah!

Chelsea hian 1954-55 season-a league nomawi an chawi bak kha league nomawi an la chawi ngai lo a, Mourinho chuan a season khatnaah thawnthu a rawn thlak danglam sak nghal. 

Portuguese manager hian hetiang taka danglamna thlen tur hian eng ang takin nge hna a thawh? tih chu zawhna awm thei a ni. Mou hian a tir takah chuan 4-4-2 diamond formation chu a duh ber a ni a, striker pahnih hnungah Frank Lampard a khelhtir. 

Mourinho-a system hmasa hi Porto-a a hlawhtlinpui a ni a, Lampard-a 'role'-ah hian Deco chu mawi takin a vul ṭhin. Mahse, Portuguese manager hian 4-4-2 diamond hi a nauten an thiam lo tih a hre thuai a, ngaihdan a thlak. 

Portuguese manager-in 'open diamond' formation hmangin a naute a khelhtir vat a, chu chuan tlarhmaah Eidur Gudjohnsen/Didier Drogba tan zalenna zau zawk a pe a, mual sir aṭangin Damien Duff leh Arjen Robben an tlan lut nasa bawk. 

Mou hian khawvela holding player ṭha ber pawl Claude Makelele a kawl tih a inhrechiang a, French midfielder hi tlarhnung leh tlarhma 'suihfintu' ah hmangin a hnung lam pawp tur a ventir a, defensive midfield hi "Makelele Role" tih hiala an koh khawpin Makelele a khel ropui. 

Portuguese manager hnuaiah Chelsea-in tlarhnung ven an ngai pawimawh em em a, tam takin 'defensive game hmuhnawm' tia an sawi laiin ṭhenkhat erawhin football hlutna tibotu tiin an sel thung. 

Hetihlaia Arsenal manager Arsene Wenger chuan, "Kan khelh dan hi a hmuhnawm zawk daih a, mahse an thawhhona a ṭha em a ni. Ramsa koham tak beitu ang mai an ni - a chauh hun an nghak a, a thisen chhuak a tam avanga a chau ta maw tihah an that mai ṭhin," tiin a lo sawi tawh. 

Mourinho ropuina tak pakhat chu player zingah dah pawimawh bik leh 'hlauh' a nei ngai lo hi a ni a, a duhdan anga khel lo player a dim ngai lo.

December 2004 a ni a, Blues hian an elpui ber Arsenal an hmachhawn - Thierry Henry vanglai a ni a, Gunners legend hian goal hnih khungin second half-ah 2-1 in Chelsea an hnufual. 

Mourinho-a'n thinrim takin  tui bottle leh thil dang a chhuih leng vel a, a player-te chu khel ṭha zawk chunga goal an khung thei lo chu a hau hrep - second half minute khatnaah Gudjohnsen-a'n goal hmangin an manager a chhang a,  2-2 in inkhel a tawp. 

Chelsea legend John Terry chuan, "Vawi khat chu pre-season training-naah Gary Cahill  nen min en a, 'In khelh ṭhat duh loh chuan pound maktaduai 100-in midang ka lei mai ang,' tiin min hrilh. Theihtawp chhuahin Gary nen kan khel zui a, Mou chuan a hnuah min rawn kuahin, 'Kha vang khan alawm tun season chhung chu bul ṭantu i nih dawn,' tiin min hrilh. A thiltihah hian a chiang em em zel a ni," a ti. 

April 30, 2005-ah Chelsea hian Bolton Wanderers chu khualmualah an lenchilh a, match thum khelh tur la nei mah se hnehna an chan chuan Premier League nomawi an chawi thei dawn. 

Mahse, second half thleng pawhin Chelsea hian goal an khung thei lo. Mourinho thinrimna player-te an cho chhuak a, a ang chiam - a player zinga pahnih chu an kawr hlipa, amah leh assistant coach Steve Clarke pe mai turin a hrilh!

Mourinho chuan, "Minute nga chhung lek pawhin in tih theih loh hi kan ti thei ang, mahse chumi zawhah chuan oxygen leh ambulance kan mamawh thung ang," a ti a, a player-te tan chuan tlawm thlak tak a ni. 

Mahse, Mourinho thinrimnain player phurna a cho chhuak a, second half-ah hian Frank Lampard chuan goal hnih a khung - 2-0 in Chelsea an chak a, a vawi khat nan Premier League-ah an champion. 

Mourinho-a defensive game-in sawisel a hlawh ṭhin a, ṭhenkhat chuan 'Park the bus' tih hialin a khelh dan an sawi ṭhin - mahse he ṭawngkam pawh hi ama tihchhuah tho a ni!

Premier League-ah thla khat hun a hmang hman chauh tiha Tottenham an hmachhawn ṭumin Mourinho hian, "Portugal-a kan sawi ṭhin angin, bus-in an rawn kal a, goal hmaah chuan bus chu an dintir ta mai a ni," a ti. 

Mourinho-a'n Premier League season a hman hmasak berah hian a hunlaia PL-a hnehna chang hnem ber, khualmuala chak hnem ber, point hmu hnem ber leh goal chhuah tlem ber record an siam. 

Chelsea chanchin zirchiangtu Rick Glanvill chuan, "Record en ila, defensive team record a ni lo a, 'complete team' record zawk a ni. 2004-05 season-ah khan Jose khan full back la chhuak a, attacking player luhtir pawh a nei fo. Tlarhma en ila, Drogba, Gudjohnsen, Robben, Duff, Cole leh Lampard-te an awm a, Premier League-a team ṭha ber pawl an ni," a ti.

Mourinho-a'n Chelsea a zawm tirha Premier League-a sawi hlawh tak pakhat chu Sir Alex leh Arsene Wenger-a 'thluak game' kha a ni a, khelmualah an naute thiamna hmangin an indo a, a pawn lamah thluak hmangin an lo inchhaih buai ve thung ṭhin. 

Chelsea-in nomawi an chawi dawn nia a lan khan Wenger leh Sir Alex hian he 'thluak game' hi an 'apply' a, mahse Mourinho chhaih buai nan a tawk lo - Portuguese manager hi he 'thluak game' ti ngaihnawmtu zingah a tel ta zawk a, a ṭawngkam chhuak apiang chu ngaihnawm a tling. 

Wenger hian, "Hmahruaitu nihlaia rilru puthmang hi a harsa lai chu a ni," a ti a, Sir Alex chuan, "Liverpool leh Everton-ah an la zin dawn a, Chelsea tak tak chu kan hria ang chu," a ti bawk - hei hi Chelsea hmahruai lai a ni. 

Mahse, Mourinho a nghing lo - a season khatnaah Premier League nomawi a chawi a, khawvelin Mourinho-a hnathawh ropui a theihnghilh thei lo. 

Pathian pawh hian pa ṭha takah min ngai a ni ang. Ka nuam tih ber hna min thawhtir a, chhungkaw duhawm tak min pe a, min ṭanpui nasa em em a ni. Pathian puihna ka dawn dan ngaihtuah hi chuan Pathian meuh pawh hian min dah sang ve hle niin a lang. 

Player ṭha tak tak ka nei a, manager ṭha tak an nei bawk. Mi chapo takah min ngai lo ula, European champion ka ni a, 'The Special One' ka ni. 

Ka football dictionary-ah hian 'hlauhna' tih a inziak ve lo.

 

Ka chhuah hnuah eng vangin nge Chelsea hi a tlakchhiat em em? Ka chhuahsan miau alawm!

Coach ka ni a, Harry Potter ka ni lo. Harry chuan magic a ti ṭhin a, kei chu ka ni lo. Magic chu thawnthu mai a ni a, football erawh thil tak tak a ni. 

Chelsea hian an tana Premier League nomawi pali chawi thei manager an neih hunah 'number two' ka ni chauh ang. Tunah rih chuan 'Juda' hi number 1 a ni e.

In hnathawh nuam in ti tak tak a nih chuan in sam a tla ngai miah lo ang. Pep Guardiola erawh a lu a kawlh a ni. 

Porto

Primeira Liga: 2002-03, 2003-04

Taça de Portugal: 2002-03

Supertaça Cândido de Oliveira: 2003

UEFA Champions League: 2003-04

UEFA Cup: 2002-03

Chelsea

Premier League: 2004-05, 2005-06, 2014-15

FA Cup: 2006-07

Football League Cup: 2004-05, 2006-07, 2014-15

FA Community Shield: 2005

Inter Milan

Serie A: 2008-09, 2009-10

Coppa Italia: 2009-10

Supercoppa Italiana: 2008

UEFA Champions League: 2009-10

Real Madrid

La Liga: 2011-12

Copa del Rey: 2010-11

Supercopa de España: 2012

Manchester United

EFL Cup: 2016-17

FA Community Shield: 2016

UEFA Europa League: 2016-17

Onze d'Or Coach of the Year: 2005

FIFA World Coach of the Year: 2010

IFFHS World's Best Club Coach: 2004,2005,2010,2012

Premier League Manager of the Season: 2004-05, 2005-06, 2014-15

Serie A Manager of the Year: 2008-09, 2009-10

Albo Panchina d'Oro: 2009-10

Miguel Muñoz Trophy: 2010-11, 2011-12

UEFA Manager of the Year: 2002-03, 2003-04

UEFA Team of the Year: 2003, 2004, 2005,2010

World Soccer Magazine World Manager of the Year: 2004,2005, 2010

World Soccer 3rd Greatest Manager of All Time: 2013

ESPN 9th Greatest Manager of All time: 2013

France Football 13th Greatest Manager of All time: 2019

European Coach of the Year - Alf Ramsey Award: 2010

BBC Sports Personality of the Year Coach Award: 2005

La Gazzetta dello Sport Man of the Year: 2010

International Sports Press Association Best Manager in the World: 2010

Globe Soccer Awards Best Coach of the Year: 2012

Globe Soccer Awards Best Media Attraction in Football: 2012

Portuguese Coach of the Century: 2015

PFA Portuguese Manager of the Year: 2017

Paulo Ferreira (RB) - Porto £13.2m. 

141 PL appearances 

3 PL wins 

4 FA Cups 

2 League Cups 

1 Champions League 

1 Europa League

Petr Cech (GK) - Rennes £7.1m. 

333 PL appearances 

4 PL wins 

4 FA Cups 

3 League Cups 

1 Champions League 

1 Europa League

Arjen Robben (FW) - PSV £12m. 

67 PL appearances 

15 goals. 

2 PL wins 

1 FA Cup 

2 League Cups

Mateja Kezman (FW) - PSV £5.3m. 

25 PL appearances 

4 goals. 

1 PL win 

1 League Cup

Didier Drogba (FW) - Marseille £24m. 

254 PL appearances 

104 goals. 

4 PL wins 

4 FA Cups 

3 League Cups 

1 Champions League

Tiago (MF) - 

Benfica £10m. 

34 PL appearances 

4 goals. 

1 PL win 

1 League Cup

Ricardo Carvalho (DF) - 

Porto £19.85m. 

135 PL appearances 11 goals. 

3 PL wins 

2 League Cups

*PL = Premier League;  

*PL appearances = club tana Premier League-a inlan zat

*PL Wins = Premier League-a hnehna 

chan zat

*£ = pound

*m = maktaduai