Khawvel footballer manto ber Neymar

Pound maktaduai 200 man Neymar chu khawvela footballer man to ber a ni ta.

Football khawvela tlarhma in­kawp hmuhnawm MSN kan hmu dawn ta lo - Neymar chuan Paris St-Germain a pan a, a man zat hi euro maktaduai 222 (pound maktaduai 200) niin French club tan kum nga chhung khel turin contract a ziak. Manchester United-in khawvela footballer manto ber ni tura Paul Pogba an leina pound mak­­ta­duai 89 chu a khum chiang hle.

Ningani thleng kha chuan Neymar-a man zat hi pound maktaduai 198 a ni a, mah se pound hlutna a tlakhniam hman avangin Neymar hi pound maktaduai 200 man a ni ta a ni.

Kum 25-a upa forward hian kum khatah pound maktaduai 40.7 a hlawh dawn a, kar khatah £782,000 a hlawh dawn tihna a ni.

Zanin dar 12:15-ah tun season-a Ligue 1 match hmasa ber chu cham­pion lai Monaco leh Toulouse-in an khel dawn a, zan dar 8:30-ah PSG chuan Amiens SC an hmachhawn ang - French club hian vawiina Neymar an phochhuah tur thu an sawi a, Amiens nen an inkhelh hunah hian an player thar tlangzarhna hun hi an nei dawn niin a lang.

Chona thar
Neymar chuan Paris khawpui lam a hawi chhan sawiin, "Paris St-Germain hmachhawpte hian he club tana khel tur hian min thlem a, hlawhtlin an duh tak takna leh thawhrimnate hian min hip em em bawk a ni," a ti.

Brazil captain ni bawk chuan, "He chona thar hma­chhawn tur hian ka inpeih a, vawiin aṭang hian ka khelhpui turte tana ka ṭangkai theihna apianga ṭangkai turin theihtawp ka chhuah ang," a ti.

PSG hian season hmasa Cham­pions League quarterfinal an lut a, Neymar-a khelhna Barca an hneh lo. French club hian first leg-ah 4-0 in hma hruai mah se Nou Camp-ah Neymar an ngam lo a, 1-6 in an tlawm a a, an tla. He inkhelah hian Neymar chuan goal hnih a khung bakah assist vawi khat a nei bawk.

Mangṭha Messi
Neymar-a'n PSG a pan chhan lian tak pakhat chu Messi hliahkhuhna hnuai aṭanga talchhuah a duh vang nia sawi ni mah se, Brazil captain a chhuak dawn tih a chian ruala thlahna thu sawi hmasa bertu chu Lionel Messi a ni a, Neymar pawhin amah kaihruaitu player ropui hi a theihnghilh lo.

Santos aṭanga hriat hlawh for­ward chuan, "Khawvela infiammi ka hmuh tawh azawnga player ṭha ber Lionel Messi kha ka teammate a ni a, khelmual chhung leh pawn thlenga ka ṭhian niin Luis Suarez nen hriatreng tawh turin kan khel ho a nih kha. Infiammiin a beisei ang zawng zawng chu ka ti hlawhtling vek a, theihnghilh theih tawh loh tur tam tak he hmunah hian ka tawng a, ka tan chuan in ang mai a ni,"

"Barcelona leh Catalonia hi ka thinlungah an cham reng tawh ang. Mahse, tunah chuan chona thar hmachhawn ka duh a, chumi tur chuan PSG hian chona min chhawp sak a, ka thinlung chuan chu chona hmachhawn tura pen chhuak tur chuan min hrilh a ni," tiin Messi leh Barca a mangṭha.

Neymar a to em?
Manchester United manager Jose Mourinho chuan, "Player manto chu an thiamna phu loa an lei ṭhinte hi a ni a, pound maktaduai 200-a Neymar lei hi a to lo. Chutihrual chuan player tam tak £100m, £80m leh £60m man an ni ve nghal ngawt tur ngaihtuah erawh kan hmabaka kan buaina tur a ni," a ti.

Liverpool manager Jurgen Klopp chuan, "Manchester City leh PSG hi heti zat sum seng thei chu an ni mai. Financial Fair Play (FFP) kha heti taka sum uchuak hmanna veng tur hian an siam emaw ka ti a, " a ti te te a, Neymar thlak nana Philippe Coutinho beiseitu Barcelona chu, "An tha an sen buai a ngai lo ang," tiin a player ṭha chhuahtir a tum loh thu a sawi nghal bawk.

Barcelona vice president hlui, tuna Lille director general Marc Ingla chuan, "Barca tan chuan tlawmna a ni a, Neymar hi Ligue 1 hmasawn zelnaah a pawimawh khawp ang. Mahse, khelmualah chuan 11 leh 11 kan inhmachhawn ṭhin a, PSG hi kan la el thei ang. Khelmualah transfer fee leh hlawh velin nghawng a nei ngai lo," tiin PSG a la cho hle.

Pound maktaduai 200-a lei theih
PSG-a jersey number 10 ha tur Neymar-a man zat hian lei theih a ngah khawp - Premier League club thar Huddersfield Town hlut zawng hi pound maktaduai 44-ah chhut a ni a, £200m hian Huddersfield ang panga a lei thei!

Transfermarket-in a chhut dan aṭanga khawvel club hlut zawnga 19-na AS Monaco a lei thei a, 2015-16 season Premier League champion Leicester City pawh a lei thei ang - Foxes hi lei hnu hian sum bang tlem azawng a la awm bawk ang.

Premier League champion Chelsea-in prize money leh broadcast fee aṭanga an sum hmuh ang zat chu £200m hian a daih var var a, PSG jersey maktaduai 1.5 a lei thei bawk!

Engtin nge an inlei?
Ningani khan PSG-in Neymar an leina tur zat pawisa nen La Liga office-ah Brazil captain aiawhte an lenglut a, mah se Spanish league sang ber thuneitute hian French club-in Financial Fair Play dan an bawhchhiaa an ngaih avangin pawisa hi an la duh lo.

La Liga-in dan an nei a, club-in player an lei chhuah dawnin an lei tum player hnenah amah lei an tumna zawt pawisa an pe phawt ang a, player hi amah a inkhul chhuak ang. A nih dan tur diktakah chuan La Liga hotute hnenah pawisa hi a pe phawt ang a, annin player neitu club an pe leh ang.

Mahse, La Liga hotuten sum an dawn duh miau loh avangin Barcelona office lamah Neymar-a aiawhte an leng a, Catalan club hian sum hi lo dawngin an inlei fel ta a ni.

Barcelona leh Neymar
June 2013-a Barcelona-in pound maktaduai 48.6-a an lakluh thu an puan Neymar-a man zat chu pound maktaduai 200 a ni ta a, mi tam tak thinlunga zawhna lo awm nghal chu Brazil captain hian eng ang chiaha sulhnu ropui nge Catalan club-ah hian a hnutchhiah tih chu a ni.

Neymar-a'n Barca tan league match 123 khelin goal 68 a khung a, season li hun a hman chhunga goal khung tam lama a tluk loh chu Cristiano Ronaldo (139), Messi (134), Luis Suarez (85), Antoine Griezmann (76) leh Aritz Aduriz (70)-te niin direct assist vawi 38 a nei bawk - a tluk loh chu Messi (54), Koke (45), Suarez (43) leh Ronaldo (42).

Brazil captain hian La Liga-ah a team tan chance (287) a siam hnem ber a, a tluk loh awmchhun chu Messi (326) chiah a ni. Season hman zawh takah khan vawi 91 ngawt chance siamin La Liga-ah amah tluktu an awm lo. Neymar hian Barcelona tan La Liga (2), Copa del Rey (3), Spanish Super Cup (1), Champions League (1) leh FIFA Club World Cup a chawi bawk.