Vawiin chhun 12:15-ah Chanmari Derby Police-in point an hmu dawn em?

Great Sports I Day Football group stage tawp lam a nih tawh avangin Lammual inkhel a hmuhnawm dawn.

Vawiin chhun dar 12:15-ah Chanmari Derby khelh a ni ang a, Chanmari FC leh Chanmari West FC te inkhel hi semifinal zawnnaa ngaih theih a ni. Tlai dar 2:30-ah point la hmu lo Mizoram Police leh Rhino Charge te an inkhel bawk ang.

Mualpho hliahkhuhna

Chanmari West-in season ṭan hmaa inpuahchahna nei ṭha Mizoram Police hnehin MFA Super Cup final an lut a, amaherawhchu West Warrior hian Chhinga Veng lakah goal nga chhuahin nomawi an en liam.

I Day Football ṭan nan Chanmari West-in Chhingcows bawk an hmachhawn a, goal nga tho an chhuah a, goal khat khung ve mah se a vawi hnih nan an mualpho.

Match khat lekah West Warrior zinkawng a tawpah ngaih theih ni nghal mah se Chhinga Vengin an ruala semifinal lut tura ngaih Chanmari FC chu 5-1 thoin an sawp. Chhingcows nena an inkhelhna aṭanga teh chuan Chanmari hming pu club pahnih hi an intluk tawk chiah a, semifinal lut tur a chiang lo.

West Warrior hian knockout stage beiseina nei turin Rhino Charge 5-2 in an sawp a, he team hi Chanmari FC-in 1-0 chauhin an hneh. Amaherawhchu Chanmari hi match khata an khelh tam bakah Mizoram Police 5-2 a an sawp tawh avangin West aiin an dinhmun a ṭha hret.

H. Vanlalthlanga kaihhruai Chanmari tan semifinal lut chiang turin Chanmari West hneh a ngai a, point khat an hlawh chhuak a nih pawhin knockout stage luh theih dan kawng a awm a, West Warrior leh Police inkhel result an nghah erawh a ṭul ang.

HC Zarzoliana hote pawhin Chanmari hi an hneh a nih chuan an point hmuh zat inang chiah mah se head to head -ah an ṭhat avangin semifinal lut thei dinhmunah an ding dawn a, amaherawhchu Mizoram Police beiseina an siam tel ang.

Chanmari leh Chanmari West-te hian an mamawh point thum an hlawh chhuak a nih pawhin an mualphona zawng zawng hliahkhuhin a la awm dawn lo a, an mangchhia theihnghilh dan awm chhun chu Chhinga Veng hneh leta nomawi chawi a ni ang.

Beisei pha lo

I Day Football khel tura chahluh Rhino Charge leh Mizoram Police-in point an la hmu lo a, Chanmari Derby-a West Warrior an chak chauhin team pahnih tan semifinal kawng hawn a ni dawn.

Chutihrualin tun dinhmunah chuan team pahnih tan semifinal beisei ngam a ni tawh lo a, an khelh hmabak ṭha taka khelh hi an tih theih tawk a ni tawh.

MFA Super Cup-a semifinal thleng thei Mizoram Police-in match hnih an khelhah goal 10 an chhuah a, nomawi beiseia inelna bul ṭan tan chuan bul ṭan ṭhat a châkawm ang. Amaherawhchu tunah chuan tih theih an nei tawh lo a, an training dan an en let a, Mizoram Premier League hma ngei an insiamṭhat a ṭul tawh ang.

Point dinhmunin a zir tawh loh avangin inelna ṭan hmaa inkhel hmuhnawm tura ngaih army team Rhino Charge leh Mizoram Police inkhelin ngaihven a hlawh loh phah sawt a ni.

Group B - Team Dinhmun
July 29, Inrinni - Rajiv Gandhi Stadium
Chanmari FC 4 - 0 Mizoram Police FC
CFC : PC Zosangliana 4', 49'; Jacob Vanlalhlimpuia 20'; C Lalrosanga 53'
Chhinga Veng FC 5 - 1 Chanmari West FC
CVFC : Malsawmfela 9'; MS Dawngliana 45'; Lalmawizuala 47' (OG); Laldampuia 69', 83'
CWFC : Lalnunmawia 30'
August 1, Thawhlehni - Lammual
Mizoram Police 2 - 5 Chhinga Veng
MPFC : Lalfakawma 3'; B. Zoramthanga 10'
CVFC : Malsawmfela 21', 76'; R. Laldinliana 62'; MS Dawngliana 62'; Lalkhawpuimawia 79'
Rhino Charge 0 - 1 Chanmari FC
CFC : Vanlalbiaa Chhangte 43'
August 3, Ningani - Lammual
Chanmari West 5 - 2 Rhino Charge
CWFC : Calvin Zosiamliana 4', 7'; H. Lallianzama 38'; Vanlalthlamuana 59'; Lalromawia 70'
RHI : L Zama 52'; Jessy Sailo 87'
Chanmari FC 1 - 5 Chhinga Veng
CFC : Rochhingpuia 75' (P)
CVFC : Malsawmfela 11'; MS Dawngliana 21', 46'; Laldampuia 61', 86'
Vawiin inkhel tur - Lammual
12:15 PM Chanmari FC vs Chanmari West FC
02:30 PM Mizoram Police FC vs Rhino Charge
August 8, Thawhlehni - Lammual
12:15 PM Chhinga Veng FC vs Rhino Charge
02:30 PM Chanmari West FC vs Mizoram Police FC
# Team Pld W D L GF GA GD Pts
1 Chhinga Veng FC 3 3 0 0 15 4 11 9
2 Chanmari FC 3 2 0 1 6 5 1 6
3 Chanmari West FC 2 1 0 1 6 7 -1 3
4 Rhino Charge 2 0 0 2 1 5 -4 0
5 Mizoram Police 2 0 0 2 2 9 -7 0