WBA-in Joshua hmachhawn tur an thlang
World Boxing Association chuan an heavyweight champion nilai Anthony Joshua chu Cuban boxer Luis Ortiz hmachhawn turin an ti. Kum 27-a upa boxer hi Wladimir Klitschko nen rematch-a inhmachhawn tura beisei an ni a, mah se Ukrainian boxer hian Ningani khan a chawlh thu a puang a ni.
WBA chuan Joshua leh Oritz hi August 3 aṭanga chhiar ṭanin ni 30 chhung an inhmachhawn tur chungchangah inngaihtuahna hun an pe. Joshua hi a IBF kawnghren kawl lai humhim tura Kubrat Pulev hmachhawn turin International Boxing Federation chuan thu an pe bawk a, December 2 hmaa Bulgarian boxer hi a hmachhawn lo a nih chuan a kawnghren hi an hlih sak tur thu an sawi.
Kum 38 mi Luis Ortiz hian match 27 a hmachhawn tawhah hnehna chang vekin vawi 23 a khingpui a knockout a, kum 36 mi Pulev hian vawi 26-ah vawi 25 hnehna changin mi 13 a knockout a, vawi khat a tlawm thung. Vawi 19 inhnek a hmachhawn tawha a khingpuite la knockout vektu Joshua hian WBA leh IBF title kawl mekin WBO (Joseph Parker) leh WBC (Deontay Wilder) erawh midang kutah a awm thung.