Mizoram Fight League a hnai leh ta

5th August, 2017

Mizoram State Mixed Martial Arts Association leh Zonet ṭangkawpin an buatsaih Mizoram Fight League chu August 11 hian a zan hnihna hman a ni leh dawn ta. MFL match hmasa ber hi June 30 zan khan R. Deng-ṭhuama Indoor Stadium, Mualpuiah khelh ṭan a ni a, zan hmasa berah DSZ Fight Club chuan point 20 hmuin an chungnung ber.

MFL zan hmasa berah preliminary round-ah bout thum neih hmasak a ni a, main card-ah fight pasarih hmuhnawm tak tak en tur a awm. August 11 zanah preliminary round-ah fight pahnih hmuh tur a awm dawn a, main card-ah bout ruk a awm ang. Inelna hmachhawntu team pali Juggernaut MMA, Promise Strivers, DSZ Fight Club leh BCA Brawlers-ten fighter an thawhchhuah pui leh ṭheuh dawn.

Hmahruaitu DSZ

MFL zan hmasa berah DSZ Fight Club aṭangin fighter pahnih chiah inlan mah se technical knockout hmanga hnehna an chan ve ve avangin fighter pahnih hian an team tan point 20 an hlawh chhuak a, table chung berah DSZ an awm phah.

DSZ tan hian featherweight-ah Lalchhuanmawia chuan a khingpui Lalremruatsanga chu round hnihna lekah TKO-in a hneh a, Kolasib Diakkawn tlangval C. Lalfamkima chuan minute hnih leh second 27 chhung leka a khingpui TKO hmanga hneh ve bawkin DSZ tan an thawhhlawk hle - MFL-ah hian International MMA Federation continental ranking system hman niin knockout (KO), technical knockout (TKO) leh submission (SUB) hmanga hnehna chang te chuan point 10 zel an hlawh chhuak a ni.

Beisei phak lo Juggernaut

Juggernaut MMA-in fighter an nei ṭha a, zan hmasa berah an fighter panga ngawt an inlan bawk avangin hmahruaitu ni chunga zan hmasa ber hmang tura beisei an ni. Mahse, beisei ang ngawtin thil a kal bik lo - Juggernaut fighter inlan panga zingah pahnih chiahin hnehna an chang thei a, an team tana point an hlawhchhuah zat chu 13 chauh a ni.

MFL zan hmasa bera hmeichhe fight awmchhunah Khawhai nula Lalvenhimi chuan submission hmanga hnehna changin Juggernaut tan point 10 a hlawh chhuak a, fighter hmuhnawm leh beiseiawm Pathianmalsawmdawngliana'n Juggernaut tan a khingpui hneh ve bawk mah se unanimous decision hmang baka hnehna a chan loh avangin a team tan point thum bak a hlawh chhuak thei lo.