Portuguese coach hoin semi final-ah Aizawl FC Group A aṭangin tla an la awm lo

Aizawl FC-in coach thar Paul Jorge Coelho Menezes hnuaia an match hmasa berah Ramhlun North FC 2-1 in an hneh. I Lea­gue champion AFC hi Great Sports I Day Football-ah Group A hmahruaitu an ni a, hei vang hian semifinal-ah tun season-a vawi riat chak zawn tawh Chhinga Veng an pumpelh dawn tihna a ni.

Inkhel hnuhnung zawkah Bethlehem Vengthlang FC leh AIFF Under 19 te 1-1 in an inhneh­tawk a, heng team pahnih bakah hian nimina inlan lo Dinthar FC leh chak lo Ramhlun North ten semifinal an la lut thei vek bawk.

AFC an phur

Portuguese coach Paul Mene­zes awm hmaa coach lailawk Rohmingthanga'n team chhungah coach tharin phurna a pek tur thu a sawi a, Lengpui tlangval thusawi dikna Lammualah a thleng.

Ṭum dang zawng aiin Aizawl FC inkhel a nung a, minute 20-naah Rochharzela'n Ramhlun North lamah a khung nghal. Chhinga Veng tlangval Rochhara hian Ramhlun North tlarhnung offside trap siam chu bumin H. Lalmuankima aṭanga a ball hmuh chu lalutin goal-ah a chantir a, goal mawi tak a ni.

Second half minute 59-naah Alfred Kemah Jaryan-a crossball in Ramhlun North player Oneyeama Francis-a kut a fuh a, Nigerian forward hi box chhungah a awm avangin penalty a chawi. Dead ball specialist Kareem Omolaja pen chhuakin goal sirah kawh zetin a pet a, Ramhlun North keeper Liansangpuia'n a ring dik lo bawk.

Ramhlun North beiseina siam turin Lalliansanga'n minute 64-naah a tauh goal a, Durtlang tlangval hian Lalrinfela cross ball a tauh lut a, Aizawl FC tlarhnung erawhin an tihtur an titawk lo. DSK Shivajians aṭanga lakluh Notea hian kumin I Day Football-ah match thum khelin goal a la khung vek.

Hun tawp thlengin Ramhlun North-in si phurh sut tumin an nawr let a, amaherawhchu Portuguese coach hnuaia khel AFC tlarhnung a phui ṭha a, Lalruatliana Sailo (Tawia) nauten chance ṭha bik an insiam tawh loh avangin I League club 2-1 in an chak.

Inkhel hmuhnawm

Bethlehem Vengthlang FC-in a zawnin hnehna an chang thei lo a, Dinthar FC an hneh hnua an match hmasa berah AIFF Under 19 nen 1-1 in an inhnehtawk.

BVT tan hian match hmasa pa­hniha goal khat ve ve khungtu B. Zoramthara'n penalty a hlah a, hei vang hian first half-ah goal a lut lo. Second half minute thumna lekah Ramengmawia cross chu Vanlalthanga'n a khung a, Chawng­thansanga hote semifinal lut turin an dinhmun a ṭha hman hle.

Amaherawhchu AIFF Under 19 an beidawng duh lo a, Floyd Pinto naute hian na zawkin an nawrlet. Lunglei rawlthar Edmund Lalrindika chu AIFF Under 19 goal nawr in-ṭanna a ni thei zel a, BVT player-te'n rawlthar duhawm hi an chelh lo.

Minute 56-naah Edmund-a ball pek chu Lalawmpuia'n si phurh sut nan a hmang a, amaherawhchu Ramlun South tlangval AwP-a hian Edmund-a goal pek pakhat zawk erawh hnai tak aṭangin a pet goal lo. Team pahnih an fimkhur zui a, goal dang a luh belh tawh lo.

Engtin zel?

Group A team te an intluk tawk avangin match hnuhnung ber thlengin a hmuhnawm dawn. Aizawl FC chu an hnuai chiaha awm Ramhlun North leh Bethlehem Vengthlang aia head to head-a an ṭhat avangin group hmahruaitu an ni chiang. Hmun ruak pakhat hi August 7 hian Dinthar FC, AIFF Under 19, Ramhlun North FC leh Bethlehem VT FC ten an inchuh dawn.

Point thum hmu ve ve Dinthar FC leh India U19 te inkhela chak zawkin semifinal luh beiseina an nei ang a, amaherawhchu match hnuhnung zawka Ramhlun North leh BVT inkhel a chak an awm chuan an beiseina a thamral ang.

BVT leh Ramhlun North inkhelah hian chak zawk an awm lo a nih chuan goal difference nei ṭha zawk Lalruatliana Sailo hoten semifinal an lut ang.

Group A - Team Dinhmun
July 28, Zirtawpni - Rajiv Gandhi Stadium
Aizawl FC 2 - 1 Bethlehem VT FC
AFC : Lalrinzuala Khiangte 18'; Kareem Omolaja 58'
BVT : B. Zoramthara 28' (P)
Dinthar FC 1 - 4 Ramhlun North FC
DFC : Samuel Laltlanthanga 78'(P)
RNFC : C. Ramdinmawia 41' ; Lalliansanga 45';
Oneyeama Francis 84', 90+1'
July 31, Thawhṭanni - Lammual
Bethlehem VT FC 1 - 0 Dinthar FC
BVT : B. Zoramthara 67'
AIFF Under 19 0 - 0 Aizawl FC
August 2, Nilaini - Lammual
AIFF Under 19 1 - 1 Ramhlun North FC
AIFF : Lalawmpuia 78'
RNFC : Lalliansanga 1'
Dinthar FC 2 - 1 Aizawl FC
DFC : Lalbiakhlua 27'; Lalnunsanga(Talea) 90+2'
AFC : Kareem Omolaja 16'
NIMIN INKHEL RESULTS - LAMMUAL
Aizawl FC 2 - 1 Ramhlun North FC
AFC : Rochharzela 20'; Kareem Omolaja 59' (P)
RNFC : Lalliansanga 64'
Bethlehem VT FC 1 - 1 AIFF Under 19
BVT : Vanlalthanga 48'
AIFF : Lalawmpuia 56'
August 7, Thawhṭanni - Lammual
12:15 PM Dinthar FC vs AIFF Under 19
02:30 PM Ramhlun North FC vs Bethlehem VT FC
# Team Pld W D L GF GA GD Pts
1 Aizawl FC 4 2 1 1 5 4 1 7
2 Ramhlun North FC 3 1 1 1 6 4 2 4
3 Bethlehem VT FC 3 1 1 1 3 3 0 4
4 AIFF Under 19 3 0 3 0 2 2 0 3
5 Dinthar FC 3 1 0 2 3 6 -3 3