Pathianni zanah FA Community Shield Chelsea Vs Arsenal

Season khuh hawnna atana hman ṭhin FA Community Shield chu Pathianni zan dar 6:30-ah khelh a ni dawn a, Premier League champion Chelsea leh FA Cup champion Arsenal te Wembley Stadium-ah an inhmachhawn dawn. London Derby hian ngaihven a hlawh a, Sony Ten 2-ah inkhel hi a en theih ang.

Chelsea-in hmun pawimawh chang nghal thei tur player pathum defender Antonio Rudiger, midfielder Tiemoue Bakayoko leh forward Alvaro Morata te an lalut a, an sum sen zat hi pound maktaduai 130 bawr vel a ni. Arsenal-in Lyon aṭangin pound maktaduai 46.5-in Alexandre Lacazette an lalut a, club record a tling pha hial. French striker bakah hian Schalke aṭangin a thlawnin Sead Kolasinac an lalut thei a, Arsene Wenger-a'n a palyer thar pahnih hi a chhawr nghal a rinawm.

Dan thar

Community Shield vawi 95-naah hian hun pangngaia an inhnehtawk a nih chuan penalty dan pangngai AB AB AB AB aiah dan thar AB BA AB BA hman a ni dawn. Inel­naah hian minute 90-a chak zawk an awm lo a nih chuan penalty pet nghal tur a ni.

Team pahnih hian substitute player pasarih aia tam lo an ziak lut thei a, inkhelh laiin player paruk aia tam lo an thlak thei bawk.

Incho tawk

Antonio Conte-a'n a season hmasa berah Chelsea chu league-ah champion pui nghal mah se Arsenal laka inchhuang tur an ni lo. Nikum September thla khan Gunners hian Blues hi 3-0 zetin an sawp a; Alexis Sanchez, Theo Walcott leh Mesut Ozil te chu goal khungtu an ni. Kumin February thlaah Conte hoten phuba la ve lehin 3-1 in an hneh let a; Marcos Alonso, Eden Hazard leh Cesc Fabregas ten goal an khung a, injury time-ah Gunners tan Olivier Giroud-a'n goal khat a khung ve hram.

May thla khan FA Cup final-ah London club pahnih hi an intawng leh a, Arsene Wenger-a hoten Sanchez leh Aaron Ramsey te goal hmangin Chelsea 2-1 in an hneh a, Diego Costa goal-in result a tidanglam pha lo. Costa-a'n season liam taah hmun pawimawh tak chang mah se Chelsea boss Conte nen an inhmu thiam lo a, Community Shield-ah hian Atletico Madrid striker hlui tel loin Blues tlarhma fiahin an awm dawn niin a lang.

Blues hian Spain interna­tional striker Costa tel loa fiah­na hmasa chu an paltlang tawh. July 22 khan Birds Nest, Beijing-ah friendly match khelin Chelsea-in Arsenal hi 3-0 in an sawp. Hemi ṭum hian Willian-a'n goal hmahruai khungin Michy Batshuayi-a'n goal hnih a khung a, Blues hian Manchester United zawm ta Nemanja Matic leh an player thar Alvaro Morata te an chhawr lo a, result hian nghawng liantham a neih phak loh pawhin inrintawkna erawh a pe ngei ang.

An pawl tawk lo

Chelsea player thar Bakayo­ko bakah team innghahna Eden Hazard te an inhliam a, Conte mit aṭanga Costa a tlin zawh loh bawk avangin Blues hi an ṭhat theih dan berin an inlan dawn lo. Chutihrualin Monaco aṭanga an lakluh Bakayoko hi beisei aia a dam chak avangin minute tlem azawng a inlan pawhin a mak lo ang.

Conte hote hian friendly match hmasa berah Arsenal hneh nghal mah se Bayern Munich (2-3) leh Inter Milan (1-2) te an hneh loh zui a, Italian manager hian an chau tih a pha lo. Blues hi Beijing aṭanga Singapore-a Bayern leh Inter hmachhawn tur hian darkar ruk thlawhtheihnaah an chuang.

Italian manager hian a player pawimawh te an hahdam theih nan Italian club an hmachhawn ṭumah tawnhriat ngah lo player pariat zet a khelhtir a, friendly match hnuhnung berah hian chak lo mah se Arsenal an hmachhawn hunah awmzia a neih phah beisei a ni.

Arsenal lam hi

Arsenal manager Arsene Wenger-a'n Champions Lea­gue khel thei tur khawpin a team a kaihruai 'pui' lo a, amaherawhchu FA Cup-ah nomawi an chawi tho avangin Community Shield-ah an inlan.

Gunners ṭantu tam takin French manager hi an sawisel a, chutichung chuan Wenger-a'n contract thar ziakin thutlukna huaisen tak tak a siam nghal. Season khat chiah contract nei tawh Mesut Ozil leh Alexis Sanchez te chuan an contract pawhsei an duh lo chungin Wenger-a'n a chelh luih a tum a, French manager hian sum um loin nomawi a melhah a ngaih theih.

Community Shield atana an inpuahchahna turah Sanchez-a'n training a zawm tawh a, entu mipui 5,000 zetin a training lai hi chhimin Chilean forward hian Arsenal badge a fawp. Ṭhiante ball siam thiam Ozil pawhin training ṭha takin a nei a, tlarhmaah Lacazette a awm tawh bawk avangin ṭum dang zawng aiin Gunners goal bawh a na ngei ang.