Leverkusen beiseina a sang

German sorkar aṭanga remtihna leh sawi hmawr hmuhna an la dawn loh avangin Bundesliga hma hun a chiang lo mek. Bayer Leverkusen sporting director Simon Rolfes erawhin May thla chhunga league an khelh chhunzawm ngei a ring.

Football kalpui dan tur hi April 30 khan sorkar lamin an puang tura ngaih a ni a, mahse an thutlukna puan hun hi May 6 atan sawn a ni. May thla tir lama khelh chhunzawm an tumna chu a hlawhtlin hmel rih lo.

Rolfes chuan, "Sorkar thuneitu lam aṭanga thu kan hriat leh hriatthiam theih ber chu entu awm loa inkhelh a ni a, kan tih theih ngei pawh an beisei. Kar leh hian sorkar thutlukna a hriat dawn, chiang takin sawi ngam rih lo mah ila May thla chhung chuan kan khelh hman ka ring," a ti.

German rama football inelna sang ber hi TV lama an pek chhuahna leh, sumdawnna lama an thawhpuite avangin a tlai berah pawh June 30-ah chuan an khelh zawh a ngai. Hri leng vangin buai mek mah se club lam chuan a hma thei anga khelh chhunzawm chu an duh.

Rolfes chuan sawi zawmin, "Kan club ngei pawh German Cup semifinal kan lut tawh a, Europa League-ah kan la dam bawk. Player-ten inkhelh an châk a, coronavirus vangin an rilru a hlauthawng tawh lo," a ti.

Bundesliga hi match khelh chhunzawm tur pakua a la awm. Champion lai Bayern Munich chuan an elpui Borussia Dortmund lakah point liin hma an hruai fal mek, an inkar a la zim avangin inelna a la ngaihnawm dawn.