Klitschko chawlh thlawptu a manager
Ningania boxing a chawlhsan thupuangtu Wladimir Klitschko manager Bernd Boente chuan a boxer chu a hunah tak a chawlh thu leh, amahah phurna a neih tawh loh avanga a glove khai a nih thu a sawi.
Boente chuan, "Wladimir hian boxer ropui tak a nihzia pholang turin fiahna hmachhawn tur a nei tawh lo. Boxing khawvela heavyweight boxer ropui ber pawl a ni reng tawh dawn a ni. Inkhelh zel a châkna a bo hun leh a hriselnain a tlin tawh loh hunah ala chawlh tur thu a sawi fo ṭhin a, chu hun chu tun hi a ni," tiin a boxer chu a hunah tak a chawlah a ngai.
Klitschko hian April khan Wembley Stadium-ah Anthony Joshua a ngam lo a, hei hi an inhnek hnuhnung ber a ni. Boxer pahnih contract-ah inhnek ṭhat leh theihna dan a awm tel avangin November-ah inhmachhawn leh tura ngaih an ni a, mah se Ukrainian boxer hian ring chhung rah leh ai chuan chawlh a thlang ta zawk.
Boetne chuan, "Thutlukna a siam chiah hi chu Ningani khan a ni. Restaurant-ah zanriah kan kil dun a, 'Ka thluak leh ka taksa ina thu min hrilh ka ngaithla ve ve a, an pahnihin 'a tawk tawh tiin min hrilh a ni' a ti. Career duhawm tak a neih tawh avangin a duhtawk tawh thu a sawi bawk a, a thusawi zawng zawng hi 100%-in ka pawm thlap a ni," a ti.
Klitschko hian boxing khawvela hun a hman chhungin match 69-ah vawi 64 hnehna a chang thei a, a hunlaia sawi hlawh tak chu amah ang thoa boxer ropui a u Vitali nen an inhmachhawn duh tlat lo kha a ni. "Kan unau kan inhmachhawn chuan ka nu thinlung a na dawn lutuk a, chu chu khawvela sum zawng zawng pawh hian a ti dam zo lo ang," tiin a unaupa nena an inhmachhawn loh chhan a sawi a, sum tam tak hmuh theihna tur ni mah se unaua inhmachhawn loh an thlang.
Unaua World champion ni thei Klitschko unau hi PhD degree nei ve ve an ni a, a u zawk Vitali hi world champion boxer zinga doctorate degree nei hmasa ber niin 'Dr. Ironfist' hminglem pek a ni. Tunah hian Kiev khawpuiah Mayor a ni mek. Wladimir hian University of Kiev aṭangin sports science-ah PhD a hmu a, ṭawng chi hrang pali nal taka hmang theiin boxing pawn lamah pawh a ngaihtuahawm loh hle.