Champions League playoff Liverpool hmaa ding tur Hoffenheim
Liverpool ṭantuten Champions League khel tur chiang saa an inngai a nih chuan an ngaihtuahna an sen ṭhat a ṭul ang. Nimin khan Champions League playoff-a inhmachhawn tur zawnna (draw) neih a ni a, Reds hmaa ding tur chu German club ṭha Hoffenheim an ni.
Hoffenheim boss Julian Nagelsmann chuan, "Tukin zingah khan champion kan tum chuan Liverpool paltlang a ngaih tur thu fiamthuin ka sawi a, Reds kan hmachhawn rinna hi ka nei sa a ni. Qualify ngei turin kan bei dawn a, kan tih theih dan tur pawh ka duang vek taw h. Club special bik, stadium ropui taka kan hmachhawn tur hi kan hlim a ni," a ti.
A harsa
Premier League club zingah Chelsea, Tottenham Hotspur leh Manchester City chu Champions League khel tur chiang sa an ni a, Europa League champion Manchester United-in an khel dawn bawk. Liverpool erawh palina an nih avanga playoff khel tur an ni a, Bundesliga palina Hoffenheim hmachhawn a awlsam dawn lo.
Liverpool boss Klopp-a'n Germany-ah tawnhriat ngah tawh mah se Hoffenheim lakah inchhuanna tur a nei lo - Borussia Dortmund a enkawl laiin vawi 14 an inhmachhawn tawhah vawi nga hnehna a chang a, vawi nga inhnehtawkpuiin vawi li a tlawm. Mainz-ah vawi hnih intawngin vawi khat a tlawm a, vawi khat an inhnehtawk.
Ngaihven hlawh
Playoff inkhel tur dangah Napoli leh Nice an intawng dawn. Napoli hi Serie A pathumna ni thei an ni a, Mario Balotelli khelhna Nice hi third qualifying round aṭanga Europa League finalist Ajax hnawtchhuak theitu an ni thung.
Celtic-in domestic treble an chawi a, second qualifying-ah bul ṭanin playoff an inpetkai - Kazakhstan club Astana an tum dawn. Brendan Rodgers-a'n domestic treble hmangin a hming a chher tawh a, Champions League group stage-ah a inpetkai pui leh a nih chuan Scottish club-ah Rodgers a hming a reh tawh lo ang.
Rooney hoin Everton
Everton-in Premier League-ah parukna dinhmun an luah avangin Europa League-ah third qualifying round aṭangin an khel a, inkhel pahnih belhkhawmah 2-0 a MFK Ruzomberok an hneh hnuin playoff an inpetkai.
Champions League playoff-a inhmachhawn tur draw neih zawh a nih hnuah nimin khan Europa League playoff draw neih ve nghal a ni a, Wayne Rooney khelhna Everton hian group stage inpetkai turin Croatian club ṭha Hajduk Split an hmachhawn dawn a ni.
Champions League Playoff Fixtures:
Champions route
Qarabag (Azerbaijan) vs Copenhagen (Denmark)
Apoel Nicosia (Cyprus) vs Slavia Prague (Czech Republic)
Olympiakos (Greece) vs HNK Rijeka (Croatia)
Celtic (Scotland) vs Astana (Kazakhstan)
Hapoel Beer Sheva (Israel) vs Maribor (Slovenia)
League route
Istanbul Basaksehir (Turkey) vs Sevilla (Spain)
Young Boys (Switzerland) vs CSKA Moscow (Russia)
Napoli (Italy) vs Nice (France)
Hoffenheim (Germany) vs Liverpool (England)
Sporting Lisbon (Portugal) vs Steaua Bucharest (Romania)
*Champions League playoff first leg hi August 15 leh 16-ah khelh a ni dawn a, second leg hi August 22 leh August 23-ah khelh tur a ni thung.