Palaihawl champion thar Rinawma
Mizoram Wrestling Championship, 2017 kharna chu nimin khan Sports Authority of India, Centre, Mission Vengthlanga kharna neih a ni a. Palaihawl champion zawnnaah East Lungdar tlangval R. Lalrinawma chuan champion lai Zodinsanga hnehin champion thar a ni.
Palaihawl champion zawnnaah hian Zodinsanga chu round 8-naah a inhliam a, hei vang hian Excise & Narcotics Sporting Club aiawh Rinawma hian hnehna changin kawnghren a hreng ta a ni.
Inelna hi Mizoram Wresling Association hnuaia affiliated club-te inelna niin, cadet, junior leh senior khelh a ni. Aizawl khaw pawn aṭangin Wresling Club hrang hrang 18 an tel thei a, wrestler mi 128 an tel a ni.
Cadet team champion hi LRS Memorial Wrestling Club, Kolasib te an ni a, Junior champion hi Lunglei Wrestling Club niin Senior-ah Project Memorial Wrestling Club, Kolasib te pakhatna an ni bawk.
He championship-a chak leh inchai ṭhate hi kumin November thlaa National Wrestling Championship Indore, Madhya Pradesh a awm turah Mizoram State ai an awh dawn a ni.