DFL-Supercup Borussia Dortmund vs Bayern Munich
Zanin dar 12:00 hian Borussia Dortmund leh Bayern Munich ten German Super Cup an khel dawn a, inkhelhna hmun tur hi Signal Iduna Park a ni.
Season liam ta khan Bayern-in Carlo Ancelotti kaihhruaina hnuaiah Dortmund hi 2-0 a hnehin Super Cup hi an chawi a, tun hi kum ruk chhung a zawna an inlanna a ni. Mak ang reng tak chu Pep Guardiola hnuaiah Bayern hian Super Cup vawi khat mah an chawi lo a, Borussia Dortmund laka vawi hnih an chak loh bakah VfL Wolfsburg lakah vawi khat an tlawm bawk.
Pre Season fuh lo
Bayern hian season thar atana inpuahchah nan friendly match vawi ruk an khel a, Premier League champion Chelsea an hneh tih loh chu an chak lo vek. Ancelotti naute hneh loh chu Arsenal (1-1, P: 2-3), AC Milan (0-4), Inter Milan (0-2), Liverpool (0-3) leh Napoli (0-2) te an ni.
Dortmund hian pre season-ah match ruk an khel a, an match hmasa berah Rot-Weiss Essen (2-3) hneh loin match hnuhnung pahnihah Atalanta (0-1) leh Espanyol (0-1) te an hneh lo bawk. Amaherawhchu Peter Bosz hote hian Bochum (2-2) nen inhnehtawkin AC Milan (3-1) leh Urawa Red Diamonds (3-2) te an hneh thung.
Coach thar nen
Season tawp rualin Dortmund-in coach Thomas Tuchel an ban a, German coach aiah Europa League final-a Ajax hruai thlengtu Peter Bosz an lalut.
Kum 53 mi coach Bosz chuan, "Pre season chauh a ni a, kan vaiin 100% in kan inpeih lo. Kawng dik kan zawh mekah ka ngai a, Bayern Munich nena kan inkhel tur erawhin nomawi a ken tel avangin a pawimawh khawp ang," tiin friendly match-in pawimawhna tak tak a neih loh thu a sawi a, nomawi erawh chawi ngei a tum thung.
Bosz hmabak hi a awlsam dawn lo a, midfielder Julian Weigl chu season tawp lama a inhliam vangin ngai a la awh lo. DFB Cup final-a inhliam Marco Reus a la chhawr theih dawn lo a, season liam taa player pawimawh Matthias Ginter-a'n Borussia Mönchengladbach a zawm bakah Sven Bender-a'n Bayer Leverkusen a pan san bawk.
Dortmund hian Leverkusen aṭanga an lakluh defender Omer Toprak bakah U21 Euro champion team zinga tel Mahmoud Dahoud leh Maximilian Philipp te an chhawr thei thung dawn. BVB hian French forward Ousmane Dembele an kawl a, kum 20 mi hi tun hnai rawlthar ṭha ber zinga mi niin goal khung turin Pierre-Emerick Aubameyang an kawl bawk a, Bayern hneh thei turin an ṭha tawk.
Neuer tel loin
Bayern Munich keeper Manuel Neuer a la dam hman dawn lo a, defender Juan Bernat ngalrek zai vangin a tel dawn lo bawk. Ancelotti kaihhruai team hi Neuer tel loin team dang an ni a, Bavarians-ah hian Philipp Lahm leh Xabi Alonso te an awm tawh lo, team thar ang hiala chhal theih an ni.
Bayern hian tun season-ah Niklas Sule, James Rodríguez, Sebastian Rudy, Corentin Tolisso leh Serge Gnabry te an lalut a, hming langsar ber James pawh Real Madrid-a hmun chang pha lo a ni. Italian manager Ancelotti chuan, "Full back hmangin goal kan nawr nasa a, midfield aṭangin puihna ṭha zawk kan mamawh. Amaherawhchu tun dinhmunah chuan goal kan chhuah nasa mah mah a, insiamṭhat kan mamawh a ni. Inkhel tura kan inpeih lo a nih pawhin a êng zawnga kan thlir thiam a ṭul a, kan phur tlan a ṭul bawk. Heng zawng zawng hi pre season-ah chuan kan la nei lo a, chutichung chuan ka player neihah hian ka lungawi tawk a ni," tiin player lak belh a tum tawh lo.