Team 'nem' Chelsea an tlawm e!
"Kan nem lutuk, kan nem lutuk, kan defending a nem lutuk," tih chu Chelsea boss Thomas Tuchel-a ṭawngkam a ni a, Thawhlehni zan khan an mikhualna ramah Southampton chu 2-1 in an ngam lo.
London club tan Raheem Sterling chuan goal hmahruai khung mah se, Romeo Lavia leh Adam Armstrong ten Saints tan an chhanglet a, an mikhual team lakah hawihhawmna an lantir lo.
Chelsea tan tun season-a an tlawm vawi hnihna a ni der ta - Leeds United lakah 3-0 in an lo tlawm tawh a, Saints lakah an tlawm leh ta bawk. Tun season-ah league match nga khelin vawi hnih chiah an la chak!
Mamawh chhanna
Chelsea-in nipui transfer-ah Romelu Lukaku leh Timo Werner an chhuahtir chungin striker pangngai lakluh an la nei lo a, Manchester City aṭangin Sterling an lalut.
English forward hian league match hmasa pathumah goal khung lo mah se Leicester lakah goal hnih a khung a, Saints lakah goal a khung leh ta bawk - inkhel ṭantir aṭangin a hlauhawm nghal a, a ball lakluh ṭha tak Armel Bella-Kotchap-a'n a lo tackle hmante chu uiawm tak a ni.
Mahse, player thiam bik a ni a, Sterling hi dan reng theih a ni lo. Minute 23-naa Mason Mount-a siamsak chu Romain Perraud chuan lo dan khalh hman mah se a per lehlam chu goal-ah a chantir ta tho a, 1-0 a ni.
A rei lo
Chelsea-in goal an khung hma a, inkhel an thunun bawk avangin fan-ten point thum nen ngeia kir an inbeisei. Mahse, London club hlim chhung hian minute nga bak a daih lo - corner aṭanga ball kal chu Lavia chuan minute 28-naah mawi zetin a khung.
City-a khelhna hmun chang lo, nipui transfer-a Saints pantu Lavia hi kum 18 mi chauh a la ni a, goal a khung chiah khan kum 2004-a piang zinga Premier League-a goal khung hmasa ber a ni - hliam vangin lakchhuah a ngai thung.
Saints-in duhtawk an tum lo a, Chelsea lakah chak an tum ngam - first half hun pek belhah Perraud-a'n ṭha taka ball a lakluh hnuah Armstrong tan a siamsak a, a shot ṭha tak chu Kalidou Koulibaly chuan lo dang perin goal-ah a lut.
Chelsea an vannei
London club-in first half-ah ball an chang tam zawk a, mahse, goal an khung tlem zawk - second half-ah insiamṭha tura beisei an ni a, mahse, mualneitu Saints chu team hlauhawm zawk an ni.
Southampton tlarhnung laiah Bella-Kotchap leh Mohammed Salisu te an ding nghet tlat a, Chelsea tlarhmain an nawr tlang hleithei lo. Saints zawkin chance an nei zui a, Chelsea an vannei.
Mohamed Elyounoussi ball tauh ṭha zet chu Marc Cucurella chuan a lo dang hman a, a per lehlam chu Norwegian forward hian shot lehnghal mah se Édouard Mendy-a'n a lo dang a, Salisu tauh luh ngei tura lang Thiago Silva-a'n goal line aṭanga a lo dang hmante chu Blues vanneihna a ni.
Tuchel a lawm lo
Tun season-a a vawi hnih nan Chelsea an tlawm a, Tuchel a lawm lo. German coach chuan, "Khelh dan tura kan duh anga minute 20-25 khelh ringawt hi awmzia a awm lo. Kan khelh dan tihbuai leh hneh kan awlsam mah mah a ni.
"Game-ah rilru kan pe tawk lo a, kan ruahmanna kan nghilh a, kan khelh ṭhat chhunzawm loh avangin hneh kan awlsam hle. Football-ah chuan tlawm chang a awm tur a ni tih ka hrethiam a, mahse, hmahruaitu nih laia half chance thlenga kan chhawrtir kha a pawi takzet.
"Second half-ah a chhanna tur kan nei lo kha pawi ka ti a, chhanna kan nei tur a ni. Mamawh hunah chuan level pawh tisangin kan ding chhuak tur a ni a, mahse, kan tithei tlat si lo a ni," a ti - he inkhelah hian Blues tan N'Golo Kante a la inlan thei lo a, damlohna avangin defender Reece James a inlan thei lo bawk.
August 30, Thawhlehni Zan
Crystal Palace 1 - 1 Brentford
CRY: Wilfried Zaha 59'
BRE: Yoane Wissa 88'
Fulham 2 - 1 Brighton & Hove Albion
FUL: Aleksandar Mitrovic 48'; Lewis Dunk (OG) 55'
BHA: Alexis Mac Allister 60' (P)
Southampton 2 - 1 Chelsea
SOU: Romeo Lavia 28'; Adam Armstrong 45+1'
CHE: Raheem Sterling 23'
Leeds United 1 - 1 Everton
LEE: Luis Sinisterra 55'
EVE: Anthony Gordon 17'
Nizan Inkhel (Result kan hre hman lo)
AFC Bournemouth 12:00 AM Wolverhampton Wanderers
Arsenal 12:00 AM Aston Villa
Manchester City 12:00 AM Nottingham Forest
West Ham United 12:15 AM Tottenham Hotspur
Liverpool 12:30 AM Newcastle United
Zanin Inkhel Tur
Leicester City 12:30 AM Manchester United