Dubai-a training nei turin NT-a a kal

Mizo boxer lar NT Lalbiakkima chuan training nei turin Dubai khawpui a pan a, British boxer Anthony Joshua trainer pawh lo ni tawh Anthony 'Chill' Wilson hnuaiah training a nei dawn.

Ruahman dan chuan NT-a hian October 22 khian Aizawlah fight a nei leh dawn a, Dubai khawpui hi thleng tawhin, September 2 aṭangin training a ṭan ang a, fight a neih hma kar khat la awmah Aizawl a rawn kir dawn a ni.

NT-a promoter leh DJMC boxing technical director Roshan Nathanial chuan, "October-ah, AR Lammualah fight nei turin ruahmanna kalpui a ni a, boxing hmuhnawm tak phochhuah kan tum. Bollywood star John Abraham pawh he fight promoter tur hian inbiakna neihpui mek a ni," tiin Vanglaini a hrilh.

NT-a hian June 18-a split decision hmanga a hneh loh Jayson Vayson chu cho nawn mah se Philippines boxer hian sum a phut hnem avangin inremna neih theih a ni lo a, Filipino boxer tho Michael Mendoza a hmachhawn dawn.

Kum 24 mi Mendoza pawh hi boxer hmuhnawm tak a ni a, vawi 15 fight a hmachhawn tawhah vawi 11 chakin vawi hnih a tlawm a, vawi hnih draw a nei - IBA intercontinental champion lai NT-a aiin tawnhriat a nei ṭha zawk. NT-a hian vawi nga professional fight a hmachhawn tawh a, vawi li chakin vawi khat a tlawm.

Siaha boxer NT-a leh Mendoza te hian WBC Asia continental title chu flyweight-ah an inchuh dawn a, an rual hian Indian boxer ṭha, Delhi nula, Urvashi Singh leh WBC Asia continental title kawltu Sachin Dekwal an inlan dawn bawk - title fight ve ve a ni ang.

Mizo boxer Laldingliana pawhin fight a hmachhawn dawn a, Afghanistan lam mi boxer chu a khingpui turin biak fel a ni tawh.