Sports Minister-in MPL9 Kick Off dawn

Zanin dar 8:00 hian Mizorama football inelna sang ber Zote Honda Mizoram Premier League (MPL) Season 9 khuhhawnna chu Dawrpui Multipurpose Hall-ah neih a ni dawn a, Mizoram sports minister Robert Romawia Royte-in a kickoff ang.

Mizoram Football Association (MFA) leh Zonet ṭangkawpin an buatsaih MPL hi Covid-19 hri leng vangin kum hnih chhung neih a ni tawh lo a, kuminah an thar thawh leh dawn a ni.

MPL9-ah hian club pariat - champion lai Aizawl FC bakah Chanmari FC, Chawnpui FC, Electric Veng FC, Chhinga Veng FC, FC Venghnuai, Mizoram Police FC leh FC Bethlehem te an inel dawn.

MPL9 hi Zote Honda-in a sponsor dawn a, Zote Honda neitu Zorammawia chuan MPL9 handbook a tlangzarh ang. Tun hnaia lawka football chawlhsan Lalchhuanmawia Fanai pawh a inlan dawn a, India tan pawha khel tawh Chhuantea hian oath taking a neihpui dawn.

Mizo trio tiha hriat lar zinga mi Jerry Zirsanga'n fixtures a pawt dawn. Jerry hi Mizo footballer hmuhnawm an sawi apianga sawi tel ṭhin a ni a, kum 16 leh ni 311 mi a nihin Kuwait lamah a khung a, India tana pet goal naupang ber a ni.

MPL Kickoff-ah hian model-ten MPL club jersey-te an rawn pho chhuak dawn a, Mizo zaithiam lar Sangteii Kuptong leh Amawii Matilda ten zaiin mipui an awi bawk ang.