Champion lai Raducanu bakah Osaka a tla

US Open hmeichhe singles champion lai Emma Raducanu chu a match hmasa berah a chak lo. Nimin zing first round inkhelah Raducanu hi Alize Cornet ngam loin a zin kawng a tawp a, nomawi a kawl lai a hum thei dawn ta lo a ni.

Inkhel dangah Naomi Osaka pawh a tla nghal. Japanese star hian tun hnaiah result nei ṭha tawk lo mah se US Open a nih chuan rinkai zingah a tel phak, amaherawhchu Danielle Collins ngam loin ani pawh a zinkawng a tawp ve nghal bawk.

Mangṭha Raducanu
Season hmasa khan Raducanu hian khawvel a barakhaih a, qualifier aṭanga in vaw tling chungin US Open nomawi a chawi. Beiseina sang tak nen Flushing Meadows, New York-ah a kir a, a thawnthu erawh a danglam ta.

British number 1 hi darkar khat leh minute 42 an inkhelh hnuah 6-3, 6-3 in a chak lo. A chak lo hi thil mak erawh a ni hran lo, tun hnaiah result a neih ṭhat hleihtheih loh avangin a lakah fans lam pawhin beisei an nei sang ngam lo.

Kum 19 mi Raducanu chuan, "Season hmasa khan thil nuam leh hlimawm tam tak ka chang a, chumi hmuna ka kir leh thei kha a boruak pawh a danglam. Tun ṭuma ka chak lo nghal mai hi chu pawi ka tiin hrehawm pawh ka ti hle.

"Chutih rualin ka sulhnu hnutchhiah tawh kha tu mahin an thaibo dawn tawh lo, champion tawh zingah khan ka hming a inziak ve reng dawn tawh a ni. Thlen chinah erawh ka la duhtawk mai lo, a sang thei ang ber thlen ka tum zel ang," a ti.

Osaka a tla
A vawi thum nana champion tum Naomi Osaka chuan Danielle Collins chu 6-7, 3-6 in a ngam lo. 2018 leh 2020 champion Osaka hian seeded 19-na lakah set a la thei lo a, amah ang thoa ball vaw na hmaah a ṭang zo ta lo.

American nula Collins hian hard court season bik a hmang ṭha ve bawk. Kumin January thla khan Australian Open-ah final a lut a, champion ta chaih lo mah se a thlen chin kha a sang, tun ṭumah pawh thleng sang tura rinkai a ni - Spanish nula Cristina Bucsa nen an intum leh ang.

Hnehna changtu Collins tan chuan, "US Open vawi hnih champion tawh, chumai ni loin Grand Slam title pawh pali ngawt nei tawh nen kan inhmachhawn a ni a, a nihna takah chuan harsa ka ti ve hle, rinkai lo zawk pawh ka ni tih ka hria.

"Match hmasa ber a nih avangin a harsa tel bawk, mahse Naomi chet fuh loh ni ka tawng hlauh," tiin a sawi a, set hloh miah loa hnehna a chang thei chu a beisei phak bakah ṭha a nih thu a sawi bawk.

Swiatek a chak
Emma Raducanu leh Naomi Osaka bakah Wimbledon champion Elena Rybakina te an tla nghal. Rybakina hian world number 131 Clara Burel chu 6-4, 6-4 in a hneh lo a, hneh nei loa tla nghal player langsar pathum zingah a hming a tel.

Player rinkai leh langsar an tlak lai hian Iga Swiatek erawh a chak. World number 1 Swiatek hian Jasmine Paolini chu 6-3, 6-0 a hnehin US Open second round a lut a, seeded pakhatna hian Greet Minnen hnehtu Sloane Stephens a hmachhawn leh ang.

Seeded parukna Aryna Sabalenka leh seeded pakuana Garbine Muguruza te pawhin second round a lut. Belarusian nula Sabalenka hian American mi Catherine Harrison chu 6-1, 6-3 in a hneh.

Inkhel harsa leh inhnehtawk takah Muguruza chuan Clara Tauson chu 6-3, 7-6 (5) in a hneh a, tleirawl Linda Fruhvirtova nen an intum leh dawn. Fruhvirtova hian Chinese player Xinyu Wang chu 6-3, 6-4 in a lo hneh ve thung a ni.